Ардагерлер – ұлт ұйтқысы

Жуырда Семей қаласында 7 мамыр – Отан қорғаушылар күні мен 9 мамыр – Жеңіс күнінің құрметіне орай жас ұрпаққа патриоттық тәрбие беруде озат атанған ардагерлер марапатталған болатын. Олардың арасында қос бірдей теміржолшы қария бар.

Атап айтсақ, «Ардагерлер ұлт ұйтқысы. Ұрпақ жалғасы, Отан қорғаушы – жастар» атты тақырыпта өткен форумда республикалық Ардагерлер ұйымының ұсынуымен Құрметті теміржолшы, «ҚТЖ» ҰК» АҚ консультативтік кеңесінің мүшесі Қырықбай Әлсейітов пен Құрметті теміржолшы, «Түрксіб-Семей» мұражайының Құрметті директоры Мақсұт Көшжанов сынды қариялар көпшіліктің қошеметіне кенеліп, марапатталды. Теміржолдың тарландары «Құрметті ардагер» лентасы мен куәлігін салтанатты түрде иеленді.  

Форумның мақсаты – аға буын ардагерлер мен кейінгі толқын жастар арасындағы рухани сабақтастықты нығайту, бастауыш ардагерлер ұйымдарындағы жастарды тәрбиелеудегі патриоттық жұмыстарды ширату болатын. Ал қос абыз ақсақал қалалық ардагерлер кеңесі президиумының белсенді мүшелері. Ешбір қоғамдық шара олардың қатысуынсыз өтпейді десек те болады. Бүгінде олардың жас ұрпақты отансүйгіштік рухта тәрбиелеу ісіне сіңіріп келе жатқан еңбектері аса зор.  

Қазіргі таңда Семей ЖТ бөлімшесінде ардагерлер кеңесі мен өскелең буын арасында байланыс тұрақты түрде жолға қойылған. Ардагерлер мен жастар ұйымының бірлесіп өткізіліп жүрген іс-шаралары соның жарқын айғағы деп білеміз.