Қарттар күні: ардагерлерге құрмет көрсетілді
Қызылорда облысы бойынша меншікті тілші
1 қазан – қарттар күніне орай Қызылорда магистральдық желі бөлімшесінің ұжымы бір топ ардагерлерді шақырып, құрмет көрсетті. Тағы бірқатар зейнеттегі қариялар отбасына азық-түлік себеті жеткізілді.
Бөлімшенің конференц-залына жиналған зейнеттегі ардагерлер қатарында 1990 жылдары бөлімшені басқарған Аралбай Дүйсенов, Данышпан Асанов, Айдарбек Мұстафаев, Махмут Майгелдиев, Бегей Құлахмет, Асылхан Шәйхысламұлы, Сисен Шермаханов, Ахмедияр Пірімбетов аман-саулық сұрасқаннан кейін жуырда ғана жөндеуден өтіп, жаңарып-жаңғырған ғимаратты аралап көрді.
Қарияларды қарсы алып, дастархан басына шақырған бөлімше директоры Ербол Сәулебеков жалпы ұлттық компанияда, теміржолда жүзеге асырылып жатқан жаңалықтарды айтып, биыл күрделі жөндеу жоспары толық орындалғанын, дистанциялар жаңа техникалар алғанын, Қызылорда теміржол вокзалынан кейін аймақтағы тағы жеті теміржол вокзалы архитектуралық қалпы сақталып қайта жаңартылғанын жеткізді. Ардагерлер де өз кезегінде ақыл-кеңестерімен бөлісіп, ізбасар буынның ісіне қолдау білдірді.
Емін еркін әңгіме-дүкен құрып, дастарханға бата беріп аттанған қарияларға мерекеге орай арнайы әзірленген сыйлықтар табыс етілді.
Сонымен қатар бұл күні Қызылорда жол дистанциясының бастығы Марат Оңалов пен кәсіподақ ұйымының төрайымы Ғалия Ноғайбаева дистанция зейнеткерлері Аманжол Аймаханов, Досжан Тәжімұратов, Дүйсенбай Әбдиев, Райкүл Наурызбаева, Ұлықпан Бахиевтің отбасына азық-түлік себетін ала барып, амандасып қайтты.
