Қарттарға құрмет көрсетілді
Атырау облысы бойынша меншікті тілші
Қазақ қоғамында қариялар – елдік пен өнегелі өмір тәжірибесінің қайнар көзі. Атырау жүк тасымалы және магистральдық желі бөлімшелеріне қарасты барлық мекемелерде «Қазан – қамқорлық айы» аясындағы айдың басында басталған шаралар әлі де жалғасуда.
Кәсіподақтың кең қолдауымен өлке темір жолының дамуына сүбелі үлес қосқан еңбек ардагерлерінің басын біріктірген мән-мазмұны ерекше шара әр станцияда, локомотив, вагон деполарында, жол, байланыс, электрмен қамту дистанцияларында, жалпы өңірдегі барлық теміржол мекемелерінде өтуде. Кездесуге келген қариялар бірі-бірімен сағына көрісіп, құшақтар айқасып, емен-жарқын әңгіме өрбіді. Қай мекемеде де қарттарға арнап дастархан жайылып, қонақтарға дәм ұсынылды. Дастархан басында қарттар әңгіме-дүкен құрып, өткен-кеткенді еске алысып, бір жасап марқайып қалды. Соңынан дойбы ойнап ой сергітті.
Қай мекемеде де болмасын ардагерлер ақтарыла сөйлеп, шараның мәнді де сәнді, мазмұнға лайықтап ұйымдастырылғанын атап өтті. Бөлімше басшыларына, кәсіподақ ұйымдарына және барша ұйымдастырушыларға риза көңілін білдіріп, кездесуден әдемі әсер, тың қуат алғандарын айтысып, баталарын берді. Соңынан ардагерлерге сый-сияпаттар табыс етілді. Сонымен қатар барлық станциялар мен мекемелердегі кәсіподақ бөлімшелері мамандары жалғыз басты, төсек тартып жатқан, әлеуметтік аз қамтылған және мүгедектігі бар зейнеткерлердің үйлеріне де барып, азық-түлік себетін табыстап, қайырымдылық акцияларын өткізді.
