Ардагер теміржолшыларға құрмет көрсетілді
Қызылорда облысы бойынша меншікті тілші
«ҚТЖ-ЖТ» ЖШС Қызылорда жол бөлімшесінің басшылығы мен кәсіподақ ұйымының төрағасы аймақ теміржолына өлшеусіз еңбегі сіңген ардагер теміржолшыларға құрмет көрсетті.
Қызылорда облысының құрметті ардагерлері, құрметті теміржолшылар Пазылбек Орынбасаров пен белгілі инженер-жобалаушы болған Бекжан Маханбетовтің шаңырағына бас сұққан олар қазына қариялардың хал-ахуалдарын біліп, ақыл-кеңестерін тыңдап, мерекелік сый-сияпаттарын табыстады.
– Бөлімше директоры Батырхан Базарбаев, бөлімше директорының бірінші орынбасары Бекжан Өтеулиев, бөлімше бас инженері Күлхан Белкібаевтармен бірге бірнеше ардагердің отбасында болып, оларды жаңа басталған жылмен құттықтап, хал жағдайын білдік, салада болып жатқан оң өзгерістермен, жаңалықтардан хабардар еттік. Құттықтай келген бөлімше басшыларына зейнеткерлер алғыстарын айтып бата берді, жас буынға табыс пен абырой тіледі. Жалпы бөлімше бойынша ардагерлерге құрмет көрсету, олармен үнемі байланыста болу жұмыстары жыл бойы жүргізіледі, – дейді кәсіподақ ұйымының төрағасы Мұхтар Көпірбаев.
Сонымен қатар өткен аптада Қызылорда белгі беру және байланыс дистанциясының Жаңақорған – Талап учаскесінде 40 жылға жуық еңбек еткен СОБ электромеханигі Дәулет Жұмабековті зейнет жасына құрметтеп шығарып салу рәсімі өткізілді. Дистанция басшылығы мен кәсіподақ ұйымының атынан әзірленген бағалы сыйлық пен құрмет грамотасын дистанцияның техникалық бөлімінің басшысы Нұрлан Жүсіпбаев пен кәсіподақ ұйымының төрайымы Ғалия Қожахметова табыстады.
