Есте қалатын ерекше күн

Маңғыстау локомотив пайдалану депосында еңбек ететін көп балалы қызметкерлердің бірінші сыныпқа баратын балалары мектепке дайын. Оларға сала кәсіподағының қолдауымен мектеп сөмкесі мен оқу құралдары сыйға берілді.

Бұл күн баланың есінде қалып, еңбек тәрбиесінде өзіндік орны бар күн болуын ескерген деполықтар ерекше дайындалыпты. Бүлдіршіндерге алдымен депоға саяхат ұйымдастырып, атааналарының жұмыс орнымен танысты. Кім біледі, олардың арасында болашақ машинистер жүрген болар.

– «Мектепке жол» акциясы – жыл сайын ұйымдастырылып келе жатқан дәстүрлі шараның бірі. Маңғыстау локомотив депосы, Бейнеу айналым депосы және Жаңаөзен айналым депосы бойынша, биыл мектеп табалдырығын аттайтын қырық балаға оқу құрал-жабдықтарымен толтырылған сөмкелер табысталды. Оларды таңдаған кезде ең бірінші сапасына мән бердік, – дейді Маңғыстау локомотив депосының кәсіподақ комитеті төрағасы Әбілсейіт Нәбиханов.  

Шынымен де, сөмкеде керекті құрал-жабдықтардан басқа баланы дамытуға арналған қосымша қолданылатын құралдың бәрі бар. Магнитті тақтайша, санау мен есепке арналған түрлі түсті таяқшалар, дөңгелекшелерден тұратын құрал да, құмсағат та бар. Оқушының шөлдегенде су ішетін бөтелкесіне дейін естен шықпапты. Дәптерінен бастап, еңбек құралдарын салатын папкасы, кітап, дәптердің қаптары, қаламдарға арналған қобдиша, қылқалам, жай қалам, түрлі түсті қарындаштар қорабы, желім, қайшы, өшіргіш, ұштағыш, сызғыш, бояу дейсіз бе, оқуға керектінің бәрі толық жабдықталыпты.