Ізгі дәстүр: Теміржолшылар бірінші сыныпқа баратын балаларға қолдау көрсетті
Қызылорда облысы бойынша меншікті тілші
Қызылорда ЖТ бөлімшесінде биылғы оқу жылында мектеп табалдырығын аттайтын 32 балаға мектеп құралдары салынған сөмке табыс етілді.
Мерекелік жиын аясында Қызылорда ЖТ бөлімшесінің бастығы Сұлтанахмет Жантөреұлы мектепке алғаш баратын бүлдіршіндер қадамына сәт сапар тіледі.
– Әр оқу жылының алдында теміржолшылардың балаларына қолдау көрсетіп, мектепке қажетті барлық құрал-жабдықтармен қамтамасыз етуді игі дәстүрге айналдырғанбыз. Бүлдіршіндерді қуанту – біз үшін үлкен бақыт. Білім жолында қанаттары талмасын, – деді бөлімше бастығы.
Ұжымның бірлігі мен қайырымдылығы мұнымен шектелген жоқ. Белкөл станциясында пойыз құрастырушы болып еңбек еткен марқұм Қуандық Жұмабаевтың шаңырағын да назардан тыс қалдырмай, мектеп жасындағы 5 баласына да құрал-жабдық салынған сөмкелер беріліп, әріптес аманатына адалдық пен бауырмалдықтың биік үлгісі көрсетілді.
