Теміржолшы жастар инклюзияны қолдауға атсалысты
Абай облысы бойынша меншікті тілші
Семейлік теміржолшы жастар ұйымы аймақ көлемі бойынша корпоративтік әлеуметтік жауапкершілік аясында ілкімді жұмыстар жүргізуде. Қайырымдылыққа негізделген мұндай акциялар қатары жуырда тағы бір маңызды шарамен толықты.
Бөлімшедегі жастар ұйымының белсенділері «Самұрық-Қазына» қорының 20 жылдығына орай «Самұрықнама: 20 игі іс» бастамасы аясында «Инклюзия күнін» ұйымдастырды. Олар Семей қаласындағы №13 және №20 мектептерде болып «Самұрық-Қазына» компаниялары ұйымдастырған инклюзияны қолдау кабинеттеріне баратын балаларға арналған танымдық-білім беру шеберлік сағатын өткізді.
Ұйым төрайымы Арайлым Қосанова бастаған қыздар мен жігіттер балаларға түрлі дамытушы ойындар мен ұсақ моториканы, логикалық ойлау қабілетін, зейінін, есте сақтау қабілетін және қимыл-қозғалыс үйлесімділігін дамытуға арналған тапсырмалар ұсынды. Сонымен қатар ой-өрісті ширатып, дене белсенділігін арттыратын жаттығуларды бірге жасады. Теміржолшы аға-әпкелерін еш жатырқамаған балалар да ойын түріндегі қызықты тапсырмаларды ыждағатпен орындап, бір-бірімен қарым-қатынас орнатып, шешімдерді бірге іздеді.
– Сөз жоқ, мұндай дамытушы сабақтар балалардың қабілеттерін шыңдап, коммуникация дағдылары мен өз бетінше әрекет ету қабілеттерін дамытуға ықпал етеді. Мұнымен қоса, әр бала өз мүмкіндігін көрсетуге және өзін ұжымның бір мүшесі ретінде сезінуге мүмкіндік беретін қолайлы орта қалыптастырады. Біздің мақсатымыз да сол болатын. Бүлдіршіндермен бірге уақыт өткізіп, олардың қызығушылықтарымен танысып, әрқайсысының өзін еркін сезініп, өз қабілетін көрсетуіне мүмкіндік беру – біз үшін маңызды, – дейді Арайлым Қосанова.