«Маңғыстау.кз» ойыншысы – үздік
Түбектің жас теміржолшысы Маңғыстау өңірі бойынша жылдың үздік жайдарман ойыншысы атанды.
Теміржолшы жігіт бұл атаққа Қазақстан КВН одағы Маңғыстау филиалының ұйымдастыруымен өткен облыстық ашық чемпионаттың финалдық сайысының қорытындысында ие болды.
Сайысқа чемпионаттың ширек және жартылай финалдық бәсекелерінде өнегелі өнер көрсетіп, озық шыққандар ғана қатысты. Соның ішінде өңір теміржолының «Маңғыстау.кз» жайдарманшылар командасы да болды. Аталған құраманың белді мүшесі, астарлы әзіл мен қағытпа қалжыңды актерлік шеберлікпен ұштастыра ойын көрсетіп жүрген Ғалымжан Жексенов «Үздік ойыншы» номинациясын алды. Әрине, бұл Ғалымжанның алғашқы марапаты емес. Топтың ішінде өзіндік орны бар жігіт барлық жарыстардан командасымен немесе өзі жүлдесіз қайтқан емес. Бұған дейін де дәл осындай аталымды бірнеше мәрте иеленіпті.
− 2015 жылы Алматы ашық лигасының «Student life» лигасы финалынан, 2017 жылы Ақтөбеде Батысаралық өңірлік КВН ҚТЖ лигасы сайысында, 2018 жылы Маңғыстау облыстық ашық чемпионатының жоғарғы лига ақтық мәресінде, сол жылы сондайақ Астанада ҚТЖ КВН лигасының финалында «Үздік ойыншы» аталымын алғанмын. Міне, Ақтау қаласында қол жеткізген бүгінгі марапатыммен осы жылы Жайдарманмен қош айтыспақпын, – деп күлді Ғалымжан.
Біздің «неге?» деп сұрайтынымызды білген ол, жайдарманшы емес пе, әзіл-шыны аралас қалжыңдай сөзін жалғады. Өйткені, Ғалымжан бес жылдан бері жүрегінде жүрген аруына үйленуді жоспарлап отыр екен.
– Анамның енді «Үздік ойыншыны» емес, үздік келін алып кел деген өтінішін орындағалы отырмын, – деп қалжыңдаған ол, – қатарларым әлдеқашан отбасылы, бала-шағалы болды, сондықтан енді мен де отбасын құрып, бар зейінімді қызметіме салып, болашақта өз салам бойынша да үздіктер қатарынан көрінгім келеді, – деген Ғалымжанға сәттілік тіледік.
Айта кетейік, Ғ.Жексенов 2016 жылы Қазақ қатынасы жолдары университетін бітіріп, 2017 жылдан бері Маңғыстау станциясында жүк транзиттік агенті болып еңбек етеді. Содан бері ҚТЖ көлемінде өтіп жатқан талай жастар форумына, КТК ойындарына қатысып, біраз марапаттарға қол жеткізген.