Теміржолшы-марафоншы
Ақтөбе облысы бойынша меншікті тілші
Ақтөбелік зейнеткер теміржолшы Жұмабай Отарғалиевтың жылды марафонмен қорытындылап жүргеніне биыл төртінші жыл. Жетпіске жақындаған ардагер 23 шақырым қашықтықты еркін бағындырады.
Жұмабай ақсақал жылдағы әдетінше қазір жыл соңындағы марафонға дайындалу үстінде. Ол үшін салауатты өмір салтын сақтанып, күнделікті жаттығу жасайды. Өңір спортшылары, қоғам белсенділерімен бірге өтетін марафонның ең алыс қашықтығын таңдайды. Ол төрт жылдан бері кәсіби спортшылардай 23 шақырымға жүгіретіндер қатарында.
«ҚТЖ қашан да спортты дамытуға айрықша назар аударып, теміржолшылардың спортпен айналысуына бар жағдай жасайды. Спорт арқылы қоғаммен байланысты дамытып, салауатты өмір салтын сақтауға күш салады. Қысы-жазы өтіп жатқан спартакиадалар соның дәлелі, жұмыс істеген жылдары да, қазір де бірде бір жарыстан қалған емеспін»,- дейді ардагер теміржолшы.
68 жастағы теміржолшы ардагер Жұмабай Отарғалиев Атырау өңірінің тумасы. 1976 жылы Ақтөбе теміржол техникумын тәмамдап, темір жол саласын пайдалану бойынша мамандық алды. Сол жылы Шұбарқұдық станциясында парк кезекшісі болып, еңбек жолын бастайды. Кейін 41 разъезд басшысы, Ақтөбеде пойыз диспетчері қызметтерін атқарған. Жезқазған-Бейнеу теміржолы құрылысының салынуына үлес қосқан.
Қырық жылдай спорттық шаралардың белсенді қатысушысы болған ағамыз 2017 жылы зейнетке шыққан соң да белсенділігін жоғалтқан жоқ. Теміржолшылар арасында велошабандоз ретінде де танымал. Осыған дейін 700 шақырым жолды 10 күнде жүріп өтіп, Ақтөбеден Қызылордаға велосипедпен жетті. Ардагер теміржолшы әріптестеріне жаңа жылда бақыт, шаттық, амандық, еңбекте үздік болуды тілейді.