Шымкент теміржол станциясында 9 айдың қорытындысы бойынша өндірістік жарақат тіркелмеген
Шымкент қаласы бойынша меншікті тілшісі
Еліміздің үшінші мегаполисі Шымкент қаласының теміржол станциясы кең, 23 жолы бар. Жүк және жолаушы пойыздарын қабылдап-жөнелту, пойыздарды сұрыптау және бұзылған вагондар жөндеуге арналған жолдар жеке-жеке, бүгінгі таңдағы жұмыс ауқымын қиналмай атқаруға толығымен жетеді. Станцияның бас инженері А.Тұртаевтың айтуынша, пандемияға қарамастан пойыздарды қабылдау-жөнелту, әсіресе жүк тиеу көрсеткіштері жылдан жылға артып келеді екен. Биылғы үш тоқсан ішінде станцияда вагон айналымы орта тәулікпен 919-ға жеткен. Мәселен, осыдан екі-үш жыл бұрын тәулігіне жоспар бойынша 40 вагон жүк тиеудің өзі қиынға түсіп, 35 вагонға орындаған кездер болыпты. Ал бүгінде станция өзіне жүктелген межені толық орындап отыр. Оған транзиттік және жергілікті вагондар айналымының көбеюі себеп болған. Бас инженердің айтуынша, жыл басынан бері станция өндірістік қажеттіліктерге байланысты материалдармен толықтай қамтылған. Атап айтқанда, жаңа тежегіш башмактар пайдалануға берілген. Р45 маркалы тасымалды радиостанциялар орнатылған. Бұдан бөлек, станциядағы жұмыс орындары қажетті тұрмыстық техника мен құрылғылар, компьютерлермен жабдықталды. «Тоғыз ай ішінде ешқандай өндірістік жарақатсыз еңбек еттік. «Қауіпсіздік күндері» аясында бес бұзушылық анықталып, кінәлілер тәртіптік жауапкершілікке тартылды. Жұмысшылардың еңбек қорғау бойынша білімін тексеру барысында жүзден аса адамды қайта оқытудан өткіздік. Қазіргі таңда алғаш қыс маусымында жұмысқа түсетін «первозимниктерді» оқытып, нұсқаулықтарды үйретіп жатырмыз», – деді бас инженер. Станцияда сондай-ақ KTZHSE мобильді қосымшасы бойынша ішкі тексерістер жүргізіліп, анықталған кемшіліктер жойылыпты. Ал «Жолда адам» ақпараттық жүйесі бойынша жыл басынан бері сегіз бұзушылық анықталған. Бас инженер станцияда шешімін күтіп отырған мәселелерді де айтып өтті. Мысалы, станция жолдарын ішінара жаңарту, жұп жолдағы вагондардың қозғалыс жылдамдығын реттейтін бекетке торап орнату, МЭО-2 бекетінің жанына су құбырын орнату қажет көрінеді. Сонымен қатар, тауар кеңсесі қызметкерлерін қауіпсіз ғимаратқа көшіру немесе ғимаратты күрделі жөндеу бойынша мәселе шешімін тапса, станция парктеріне бейнебақылау орнатылса, теміржолшылардың жұмысы жеңілдей түсетінін айта кетті.