Жиделі станциясының теміржолшылары көнетоз нысанда қатал қысқа төтеп беруге бекініп отыр

Тоғыз жолды тоғыстырған Шу станциясынан Сарышағанға апаратын қос рельсті бойлай жүре берсеңіз, отыз шақырымнан аса бергенде алақандай ғана ауыл көрінеді. Бұл – төртінші класты Жиделі станциясы. Қырық шақты түтіні бар алақандай елдімекен сырт көзге жұпыны. Оңтүстік өңірге қатынайтын барлық пойызды күтіп алып, шығарып салатын шағын станцияның ғимараты сонау Кеңес заманында тұрғызылған. Сылап-сипауымен әрін тайдырмай тұр демесең, ескірген.

«Мен станция басшылығына келгелі он алты жыл. Одан төрт жыл бұрын, яғни 2001 жылы жылу құбыры ауыстырылыпты. Содан бері бір шегесі жаңартылған жоқ, күзгі, көктемгі тексеру комиссиялары келген сайын ахуалды жасырмай айтып келеміз. Бірақ станция ғимаратын жөндеу жұмыстарына қаржы қаралмай тұр. Міне, тағы қыс келді. Ал бұл аймақтың ауа райы қатал, бұрқасын бораны, ызғарлы желі қыс бойы бір тынбайды. Қар қалың түседі», – деді станция басшысы Әнуар Дәулетбақов.

Бір қуанарлығы, станцияның қазандығы электрмен жылытылады. Ауыз суды сусорғыдан пайдаланады. Жиделіліктердің қысқы отыны – көмір. Көмір жеткізуден кедергі жоқ, тұрғындар қыстық отынды уақытылы түсіріп алған. Станцияда екі кезекші еңбек етеді – Ержан Жангутиев пен Асылзат Махамадиев. Екеуі де берідегі Шу қаласынан қатынап жұмыс істейді.

«Жиделінің қысы қытымыр. Осында бірнеше жылдан бері жұмыс істейміз. Қыс жақындағаннан жұмыс орнымыздың есік-терезелерін қымтаған боламыз. Бірақ ағаш материалынан жасалған есік-терезелер ескірген, жылу сақтамайды, суық өткізеді. Осыны жаңалап беріңіздер деп басшылыққа жылда құлаққағыс жасап келеміз», – деген өтініштерін айтады олар да.

Тіршілігі бұйығы ауылдың тынысын ашып тұрған Жиделі станциясының төрт жолын босатпай пойыздар күндіз-түні жөңкіліп жатыр...