Болашақ станциясында жүк ағыны жыл сайын еселеніп келеді

Елдің шалғайында жатқан Болашақ станциясында жылдан жылға қозғалыс артып, жұмыс қызуда. Былтыр болашақтық теміржолшылар 2 миллион тоннаға жуық жүк айналымын жүзеге асырған. Болашақ – Түркіменстан жолы арқылы сонша жүк ел асып, станцияның табысын еселеп арттырған.  

Станция бастығы Мақсат Нұрбековтің айтуынша, өткен жылы Болашақтан Түркіменстанға қарай 1,5 миллион тоннаға жуық  жүк тапсырылыпты. Оның негізгі бөлігін астық өнімдері арпа, бидай, ұн, макарон және күнбағыс майы алады. Сонымен қатар қағаз, металл конструкциясы, пиломатериал, құбыр, матор майы да бар. Ал көрші елден келген импорттық тауарлардың басым бөлігі – химиялық жуу құралдары, үй-тұрмыстық заттары, жеміс-жидектер мен сусындар, мата қапшықтары, пластмасса бұйымдары, күкірт қышқылы, т.б. көрінеді.

–  Былтыр Болашақ станциясы жылды жақсы аяқтады. Биыл жүк айналымы артады деген жоспар бар. Егер жүк айналымы біз болжағаннан да асып кетер болса, қосымша штаттар сұратып, жолдар ашуды қарастырамыз. Не дегенмен нәтижесін алдағы уақыт көрсетеді.  Жалпы, станцияның жұмыс қарқыны жоғары. Өткен жылы Түркіменстанға қарай 581 пойыз 24 093 вагон-1 млн 349 523 тонна жүк өткіздік. Кері бағытта 531 пойыз 22 322 вагон-341 066 тонна жүкті қабылдап алып, қажетті станцияларға жөнелттік. Бұл көрсеткіштер алдыңғы жылғымен салыстырғанда едәуір артқан, – дейді Болашақ станциясының бастығы Мақсат Нұрбеков.  

Станция бастығының сөзіне сүйенсек, Болашақ арқылы Түркіменстан теміржолына тапсырылып жатқан жүктер Түркіменстанның өзіне және Иран мен Ауғанстанға бағытталған. Олар – Ресей, Қытайдан және еліміздің өңірлерінен жеткізіліп жатқан өнімдер. Көрші елден біздің темір жолға өтіп жатқан жүктер Ауғанстан мен Ираннан Ресей мен Қазақстанның қалаларына жеткізілетін тауарлар екен.