Шығыста көмір мәселесі тамызға дейін шешімін таппақ
Абай облысы бойынша меншікті тілші
Көмір тасымалы – елдегі ең маңызды әлеуметтік жүк. Жыл он екі ай күн тәртібінен түспейтін мәселеге байланысты шығыстағы теміржол басшылығы соны шешім қабылдап отыр.
Семей ЖТ бөлімшесінің теміржолшылары биылғы көмір тасымалына ерте кірісіп, жылдағы үрдіске қарағанда анағұрлым қарқын алдырмақ. Сөйтіп, облыстағы барлық әлеуметтік нысандарда 1 тамызға дейін көмірдің жүз пайыздық қоры болуы тиіс. Бұл туралы аймақ басшысы Даниал Ахметов жылыту маусымына дайындық мәселесі бойынша қала және аудан әкімдерімен, басқарма басшыларымен өткізген кеңесте айтты.
Бұл бағыттағы жұмыстар алдағы уақытта «ҚТЖ» ҰК» АҚ «Семей ЖТ бөлімшесі» филиалы басшылығымен бірлесіп пысықталмақ. Яғни, аймақтағы барлық жылу беру ошақтарын, көмір тұйықтарын жылдағыдан әлдеқайда ерте әрі 100 пайыз көлемде көмірмен қамту мақсатында ұлттық тасымалдаушы компанияға ертерек тапсырыс беріліп, жеткізілу, таратылу барысы қадағалауға алынбақ.
Жергілікті атқарушы билік өкілдері теміржолшылармен бірлесіп, көмірді жеткізу, жөнелту және тарату мерзімдері мен отын мөлшері ескерілетін нақты кесте жасалатын болады. Мұнымен қатар, облыстағы көмір сату нүктелерінің, көмір тұйықтарының жұмысын тексеру және осы тізбектен алыпсатарларды, әсіресе шалғай аудандарға қатысты делдалдарды анықтау, шара қолдану бойынша жұмыс жүргізілмек.
Бүгінде Семей ЖТ бөлімшесінің логистика және жүк тасымалын ұйымдастыру бөлімінің қызметкерлері қауырт қызметке кірісті. Бұл бағыттағы жоспарлы шаралар мен техникалық поцесс барысы тораптық жиындар барысында жан-жақты талқыланбақ. Қазіргі күннің өзінде көмір тасымалына жауапты бірінші класты Дегелең және Жаңа-Семей жүк станцияларындағы межелі жұмыстар пысықталып жатыр.