Семейлік теміржолшылар өңірге 354,3 мың тонна көмір жеткізді
Абай облысы бойынша меншікті тілші
Семейлік теміржолшылар күзгі көмір тасымалына ден қоюда. Қыркүйек айының басынан тұтынушылар тарапынан сұраныс күрт артқан. Оған жергілікті атқарушы биліктің қатты отынды ерте қамдау керектігі туралы ескертуі мен «көмір бағасы көтеріледі екен» деген ел арасындағы алыпқашпа әңгіме де себеп болуда.
Бүгінгі таңда аймақ тұрғындары үшін жалпы көлемі 354,3 мың тонна көмір жеткізілген. Әйтсе де, Семей мен Защита және Аягөз станцияларына қарасты көмір тұйықтарында қарбалас байқалады. Сол себептен де семейлік теміржолшылар көмір саудалаушы жеке серіктестіктермен, әкімдіктермен бірлесіп жан-жақты жұмыс жүргізуде. Бұл орайда өңірдегі барлық әлеуметтік нысандар мен білім беру мекемелері 100 пайызға, ал денсаулық сақтау нысандары 98 пайызға көмірмен қамтылған. Сұраныс тек жеке сектор тарапынан артуда.
Семей ЖТ бөлімшесі басшысы Владимир Бабиченконың қадағалауымен вагондарды уақытында жинап алу, бос вагондардың кіреберіс жолдарда тұрып қалуына жол бермеу, сондай-ақ, іргелес елдерден келген вагондардың станция басында кептеліс тудырмай дер кезінде қайтарылуын қамтамасыз ету мәселелері басымды орынға қойылған.
Сол тәрізді аймақтағы ірі қазандықтар мен жылу электр станцияларының қатты отынмен қамтылу деңгейі – 61%, шағын қазандықтар 81%-ды құрап отыр. Жалпы, қазіргі таңда тұрғындарға алғашқы қара суық түскен кезде дүрбелеңге түспес үшін көмірді қазірден бастап алуға кеңес берілуде.
– Қазіргі таңда Семей ЖТ бөлімшесіне қарасты барлық теміржол тұйықтарында 13,7 мың тоннадан астам көмір бар. Оның ішінде Өскемен қаласында – 5,5 мың тонна, Риддер қаласында – 4,8 мың тонна, Глубокое ауданында – 600 тонна, Алтай ауданында – 2,6 мың тонна, Шемонаиха ауданында – 210 тонна. Бюджеттік ұйымдар 39,6 мың тонна көмірмен қамтамасыз етілген, – дейді бұл орайда бөлімшенің логистика және жүк тасымалын ұйымдастыру бөлімі мамандары.
Қазіргі күнгі көрсеткіш бойынша көмір тұйықтарына тәулігіне орта есеппен алғанда 15-20 вагон көмір жеткізіледі екен. Әйтсе де, алдағы уақыттарда Семей, Өскемен, Шар мен Аягөз қалалары бойынша оның санын арттыру көзделіп отыр.
Соңғы айдағы көрсеткіштерге сүйенсек, бөлімше бойынша көмір тасымалының анағұрлым артқаны байқалады. Көмір тасымалында кестеден ауытқу жоқ және тосын кедергілер туындамаған. Вагондар жетіспеушілігін шешу мақсатында алдын ала іс-шаралар қабылданған. Сол себептен де Дегелең станциясы мен Жаңа-Семей жүк станциясындағы жұмыс барысы мейлінше ширатылуда. Қазіргі таңда екі станция аралығында тәулік сайын салмағы 6 200 тонналық 63 вагоннан тұратын жылжымалы құрамдар жолға шығарылуда. Алдағы уақытта бұл көрсеткіш біршама артуы мүмкін. Теміржолшылар кез келген тосыннан қабылданатын шараларға дайын отыр.
Жалпы, семейлік теміржолшылар үшін меже – алдағы екі жылда 10 млн тонна көмір тиеп жөнелтуге қол жеткізу болып отыр.