Көмір тасу бойынша вагондар саны артқан
«Қазақстан теміржолшысы» газетінің тілшісі
Индустрия және инфрақұрылымдық даму министрлігі 2022- 2023 жылдарға арналған коммуналдық-тұрмыстық сектор мен тұрғындар үшін қатты отынға қажеттілік жоспарын қалыптастырды.
Жоспарға сәйкес көмірді тұтыну көлемі шамамен 9,6 млн тоннаны құрайды. Оның ішінде коммуналдық-тұрмыстық секторға – 2,6 млн тонна, тұрғындарға – 7 млн тонна. 9 қыркүйектегі жағдай бойынша көмір қорымен қамтамасыз ету 71%-ды құрап отыр. Жалпы, бүгінде разрездерде көмір қоры жеткілікті мөлшерде және өндіру жұмыстары жоспарлы түрде жүзеге асырылып жатыр. Қыс – қыр астында, сондықтан жылу маусымына дайындық жұмыстары да ширатылған. Күнделікті жергілікті атқарушы органдардың, көмір өндіруші компаниялар мен «ҚТЖ» ҰК» АҚ өкілдерінің қатысуымен жиындар өткізіліп, халықты және коммуналдық-тұрмыстық секторды көмірмен қамтамасыз ету бойынша мониторинг жүргізіледі.
Халықты қажетті деңгейде көмірмен қамтамасыз ету мақсатында министрлікпен «Қазтеміртранс» АҚ-ның вагондар паркін ұлғайту және көрші мемлекеттерге әлеуметтік көмірді автокөлікпен әкетуді шектеу бойынша қосымша шаралар қарастырылған. Көмір өндіруші компаниялардың жедел деректері бойынша 2022 жылғы қаңтар-шілде айларында 66,4 млн тонна көмір (көмір концентратын қоспағанда) өндірілді. Бұл өткен жылдың тиісті кезеңімен салыстырғанда 106%-ды құрайды, 2021 жылдың 7 айында 62,8 млн тонна болған. Ірі көмір компаниялары бөлінісінде «Шұбаркөл көмір», «Восточный», «Майкөбе-Вест» және «Қаражыра» разрездерінде өндіріс өсімі байқалады.