Атырау жүк тасымалы тоғыз айда табысты еңбек етті

Атырау жүк тасымалы бөлімшесінде биылғы тоғыз айдың қорытындысы жаман емес. Негізгі 15 көрсеткіштің бесеуі жүз пайыздан аса орындалған. Қалғандары да соған жетеғабыл, жалпы алғанда өңірде тасымал тасқыны қанағаттанарлық деуге болады.

Өткен тоғыз айда жүк айналымы техникалық жоспарға сәйкес 99,8 пайызға орындалып, 8070 млнткмнеттоны құрады. Жүк тиеу 100 пайыз, жергілікті вагон айналымы 100,9 пайыз, вагонның орташа статистикалық салмағы 100,3 пайыз, тиелген вагонның динамикалық жүктемесі 100,8 пайыз, пойыздың орташа салмағы 100 пайыз орындалған. Байқап отырғанымыздай, жүк көлемі жеткілікті. Бірақ, локомотив жүрісі, учаскелік, техникалық жылдамдық, жүк вагондарының өнімділігі сынды кейбір көрсеткіш төмен. Оның себебі неде?  

Себебі, негізгі жүк көзі мұнай және мұнай өнімдері болғандықтан, оларды өндіретін зауыттардың қызметі тасымал көлеміне тікелей әсер етеді. Бөлімшенің өндірістік-техникалық бөлімі берген мәліметке сүйенсек, жүк тасымалдауда темір жолдың не теміржолшылардың жұмысында кемшілік жоқ. Олар өз міндеттерін толық орындап келеді. Мәселе зауыттар жұмысында және басқа факторлар бар. Ең алдымен, 15 сәуір-15 мамыр аралығында Атырау мұнай өңдеу зауытының кейбір қондырғыларының жөндеуге тұруы тасымал көлемінің кемуіне әсер еткен. Сондай-ақ, 1-31 тамыз аралығында «Теңізшевройл» ЖШС өндірістік нысандары да күрделі жөндеуге тұрды. Болашақ зауытында 7 тамызда бұзылған қондырғы күні бүгінге дейін жөнделе қоймады. Оған қоса, Украинадағы соғысқа байланысты онда экспорттық мұнай өнімдерін жөнелтуге тыйым қойылды. Сондай-ақ, «Теңізшевройл», «Батыс Транс Групп», «Истком Транс» сынды өңірдегі бірқатар алпауыт компаниялардың жүктері түрлі себептермен тиелмей қалған жағдайлар орын алған. 9-14 мамырда Грузияға да жүк жіберуге конвенциялық тоқтам қойылды. Міне, осындай себептер көрсеткіштердің толық орындалуына кедергі болғаны анық.  

Сонымен қатар, ақаулы шпалдардың кесірінен кейбір учаскелерде жылдамдықты шектеуге ескерту берілуі, жолда тастанды пойыздардың көбеюі, малдың жолға шығып кетуі сынды жағдайлар локомотивтің жүрісіне және жылдамдығына, жүк айналымына да кері әсер еткені сөзсіз. Оның үстіне биыл өңірде 92 шақырым жол күрделі жөндеуден өтіп, жол жөндеу машиналарының және байланыс, электрмен қамту дистанцияларының жұмысы үшін Атырау-Қиғаш, Мақат-Сағыз, Мақат-Құлсары учаскелерінде жалпы 2832,2 сағатқа созылған 786 технологиялық толаскез берілген. Ол да тасымалға кері әсер еткен. Өткен 9 айда малдың кесірінен 425 шұғыл тежеу болған. Бұл – локомотив өнімділігі үшін де, жүк тасымалы үшін де үлкен кедергі. «Міне, осындай себептер мен салдарларды айтпағанда жұмыс көлемі толықтай орындалуда» дейді бөлімшенің өндірістік-техникалық бөлімінің бастығы Әзиз Айжарықов.