Мұнай тасымалы азайған
Атырау облысы бойынша меншікті тілші
Атырау жүк тасымалы бөлімшесі өткен жылды табысты қорытындылады. 2022 жылдың 12 айындағы табыс көлемі алдыңғы жылмен салыстырғанда млрд жарым теңгеге артып, қырық млрд теңгеге жуықтаған.
Десек те, экономиканың негізгі бөлігін құрайтын өңірдегі мұнай өнімдерін өндіру, оны тасымалдау көлемі, құрылыс материалдары мен халық тұтынатын, басқа да тауарлар тасымалы да қалыпты деңгейде тұрақтай алмағанын да айта кеткен жөн. Соның ішінде ресурсұстаушылардан қара мұнай өнімдеріне деген тапсырыс бұрынғыға қарағанда төмен болғанын көреміз. Оған ең алдымен нарықтағы жағдай, ауқымды дағдарыс әсер еткен, Ресей-Украина арасындағы қақтығыс, мұнай бағасының тұрақсыздығы, өнімнің болмауы және сатып алушылардың төлемқабілетсіздігі де себеп болған.
Өткен жылы бөлімшеде қозғалыс қауіпсіздігін өрескел бұзу оқиғасы болмаған, бір оқиға, 2 инцидент тіркеліпті. Еңбек қорғау бойынша пойыздарды қарау кезінде бір вагон құрастырушының денсаулығы күрт нашарлап кетіп, басын вагонға соғып алған. Оған дер кезінде жедел жәрдем көрсетілген.