Қызылордалық теміржолшылар қаңтарда 536 вагон тұз жөнелткен

Қыс маусымында тұрғындарды қатты отынмен қамтамасыз ету теміржол тасымалымен жүзеге асатындықтан аймақ теміржолшылары жүк вагондарына тапсырыс берушілердің сұранысын бірінші кезекте қанағаттандыруға тырысады.

Облыс әкімдігінің көмірге деген сұранысы қаңтар айында 208 пайызға орындалды. 13 900 тоннаға берілген тапсырыс 28 980 тоннаға жеткізілген. Қызылорда бөлімшесі бастығының логистика жөніндегі орынбасары Мейрамбек Шолтабаев бүгінде көмір базаларында көмір қоры жеткілікті екенін және тапсырыстардың уақытылы орындалып жатқанын білдірді. Жалпы биылғы қыс маусымында көмір тапшылығын болдырмау мақсатында атқарылған жұмыстар тиянақты жүргізілген. Өткен жылдың қыркүйегінен бастап көмір тасымалына күш салынып, қыркүйек пен қаңтар айына дейінгі жұмыстардың орындалу көрсеткіші 102,8-208,5 пайызаралығында орындалған.  

Тек көмір тасымалы емес, жергілікті жүк жөнелтуде де теміржолшылар табыссыз емес. Мысалы, желтоқсанда 536 вагон тұздың 227 вагоны республика көлемінде, 309 вагоны ТМД елдеріне жөнелтілген. 766 вагон құмның 185 вагоны ел ішіне, 581 вагоны ТМД-ға жөнелтілген. Ал қаңтар айында 552 вагон тұз, 95 вагон күріш, 319 вагон цемент, 981 вагон құм мен 53 вагон шыны республика ішіне және ТМД елдеріне тиеліп жөнелтілген. Сонымен қатар аймақтағы Шиелі, Жаңақорған станцияларынан тиелетін қиыршық тас, Арал теңізі станциясынан артылатын тұз бен қиыршық құм, Қызылорда шыны зауытынан шығарылатын әйнек-шынылар, Сырдың ақ маржаны – бәрі-бәрі аймақ теміржолының қызметін пайдаланып, логистикалық тасымал қызметін арттыруда.  

Тапсырыстардың дер кезінде кәсіби деңгейде ұйымдастырылуына логистика бөлімі мамандарының қосып отырған үлесі мол. Бөлім басшысы Қанат Абылбеков, Тасымалды ұйымдастыру бөлімінің бастығы Нұрлан Жайсаңбаев, жетекші инженерлер Алтынгүл Шигенова мен Нұргүл Жанекеева – логистика саласында ұйымдастырушылық шеберліктері қалыптасқан мамандар.