Өткен жылы ҚТЖ желісі бойынша жүк экспорты 30%-ға өсті

Қазақстандық жүк жөнелтушілер контейнерлік тасымалдаудың артықшылықтарын оң бағалады, деп хабарлайды Rail-news.kz.  

Олардың ішінде – сенімділік, жеткізу жылдамдығы және жүктің сақталуы. 2022 жылы ҚТЖ желісі бойынша тасымалданған экспорттық жүктердің жалпы көлеміндегі контейнерлік тасымалдар үлесі 4,4% (3,5 млн тонна) құрады.

Контейнерлермен экспорт өткен жылы 30%-ға өсті. Экспортқа астық өнімі бар 49 мыңнан астам ЖФБ жөнелтілген, 2021 жылға қарағанда өсім 4,2 есе. Жүк Қытайдың Алашанькоу, Үрімші, Сиань, Чунцин станцияларына, сондай-ақ ТХКБ бойынша Түркияның Мерсин портына жөнелтіліп отырды.

Контейнерлерде мұнай өнімдерінің экспорты 14,4 есеге, ұнтақ өнімдерінің (кебек, құрама жем, бидай ұны) 6,3 есеге өсті. Негізінен жүк ҚХР-ға жөнелтілді.

Өткен жылы Түркияға үлкен биг-бектерде ферросилиций, Қытайдың Шанхай, Сиань және Нантун қалаларына өсімдік майы, Түркия мен Грузия бағытында ТХКБ бойынша контейнерлерде түсті металдар жөнелтілді.

Бүгінгі таңда контейнерге жарамды экспорттық жүктердің әлеуеті шамамен 22 млн тоннаны немесе тасымалданған экспорттық жүктердің жалпы көлемінің 28%-тін құрайды.