Қазақстан мен Орта Азияның экспорттық әлеуеті талқыланды
«Қазақстан теміржолшысы» газетінің тілшісі
Кеше елордада көлік-логистика саласындағы ірі кәсіпорындардың ұйымдастыруымен «Қазақстан мен Орта Азияның экспорттық әлеуеті: мәселелері және шешімдері» атты дөңгелек үстел өтті.
Маңызды жиынның өтуіне KAZLOGISTICS Қазақстанның көлік тасымалдаушыларының одағы, Көлік және коммуникация ғылыми зерттеу институты, «Орталық Азиядағы көлік және логистика бойынша серіктестік» қауымдастығы, Ғылыми-зерттеу және жобалық ұйымдар қауымдастығы, «Жібек жолы» институты мұрындық болды.
KAZLOGISTICS Қазақстанның көлік тасымалдаушыларының одағы Президиумы төрағасының орынбасары, «ҚТЖ» ҰК» АҚ директорлар кеңесінің төрағасы Юрий Лавриненко дөңгелек үстелді ашып, еліміздің транзиттік саладағы мәселелері мен жетістіктеріне тоқталды. Ал «ҚТЖ» ҰК» АҚ «Бизнес трансформациялау орталығы» филиалының директоры Ержан Наурызбаев ҚТЖ-дағы трансформациялау және негізгі даму жобалары туралы баяндады.
– Мемлекет басшысы «Қазақстан темір жолы» компаниясын ұлттық көліктік-логистикалық компанияға трансформациялау туралы тапсырма берген болатын. Компания осы тапсырманы басшылыққа ала отырып еліміздің көліктік әлеуетін дамыту, Қазақстанды өңірлік сауда хабы ретінде өркендету, мультимодалды тасымалды ұйымдастыру, инфрақұрылым мен оны пайдалану әлеуетін арттыруды мақсат етеді. ҚТЖ-да логистиканы дамыту бойынша бірқатар шаралар қабылданған. Атап айтсақ, бұл ретте үш бағыт бар, біріншісі, компанияның логистикалық қызметтерін күшейту, транзиттік бағдарларды және өңірлік хабты дамыту, – деді Ержан Наурызбаев.
«Орталық Азиядағы көлік және логистика бойынша серіктестік» қауымдастығының президенті Берік Бөлекбаев Қазақстан мен Орта Азия экспорттаушыларының көліктік-логистикалық қажеттіліктері мәселесіне тоқталды. Жиында сондай-ақ көлік дәліздерін дамытудың өзекті тұстары, Транскаспий бағдары: «тар» жерлер және даму перспективалары, ТХКБ дамыту стратегиясын жасау қажеттілігі, контейнерлік тасымалды дамытуды мемлекеттік қолдау, Маңғыстау-Баутино теміржол желісін салу бойынша ұсыныстар, «Қорғас-Шығыс қақпасы» АЭА аумағында экспорттық өндірістерді орналастыру, көлік-логистика кешенін тиімді дамыту үшін кәсіби кадрлар дайындау, жүк жөнелтушілер мүддесі үшін логистикалық тізбектерді оңтайландыру тәсілдері туралы мәселелер жан-жақты талқыланды. Әр қатысушы осы тақырыптар бойынша баяндама жасап, дөңгелек үстел соңында солардың негізінде ұсыныстар берілді.
Іс-шараға TLK Media ақпараттық қолдау білдірді.