Дегелең станциясынан бір аптада 100 мың тоннадан астам көмір жөнелтілген
Абай облысы бойынша меншікті тілші
Семей жүк тасымалы бөлімшесінде соңғы аптадағы жүк айналымы бойынша мониторинг жасалынып, сараптамалық қорытынды әзірленді. Аталмыш бағыттағы шара қай салаға басымдық беру керектігін анықтайды.
Бөлімшенің өндірістік-техникалық бөлімі мамандарының айтуынша, жазғы маусымға жасалынған болжамдар дәл келуде. Осыған дейін күтілгендей, жолаушы тасымалы күрт қарқын алып отыр. Тек қана мамырдың 29-ы мен маусымның 4-і күндері аралығында 11 295 жолаушы жергілікті теміржол вокзалдарынан сапарға аттанған. Бұл – биылғы жылғы рекордтық көрсеткіш. Оған қосымша бір себеп аптаның тақ күндері жүретін Семей – Достық, Өскемен – Достық пойыздарының қайта іске қосылуы болып отыр.
Десек те, негізгі назар жүк тасымалына аударылып отыр. Бұл орайда көмір тасымалы саябырлайтын емес. Бөлімше бойынша тиелген жүктер арасында қатты отын бәз-баяғыша алғашқы орында тұр. Өткен бір апта ішінде Дегелең станциясынан 103 397 тонна көмір тиеліп, жөнелтілген.
Ал негізгі ерекшеліктердің бірі облыс бойынша түсті металл тасымалының артуы болып отыр. Бұл орайда Жаңғызтөбе станциясына түсетін салмақ біршама артқан.
Келесі кезектегі жүктер ішінде құрылыс материалдарының үлесі жоғары. Соның ішінде әсіресе цемент өніміне сұраныс күрт жоғарылағаны байқалады. Апта ішінде 47 698 тонна материал тиелген. Салыстырмалы түрде алғанда бұл да жоғары көрсеткіш. Оған Астана мен Алматыдан келген ірі компаниялардың жаңа облыс орталығы Семей қаласынан тұрғын үйлер құрылысын жүргізуі себеп болуда.
Мұнымен қатар металл сынықтары мен астық тасымалы байырғы көрсеткіш көлемінде тұр. Ал контейнерлік тасымал біршама жоғарылаған. Осындай көрсеткіштерді анықтап берген жүк айналымына жасалған мониторинг басым бағыттарды анықтаумен қатар алдағы айға болжам жасауға да мүмкіндік беріп отыр.
Жүк айналымын реттеу бойынша қолға алынған, басымдық берілген негізгі міндеттердің бірі пойыздарды кедергісіз жөнелту. Бұл орайда Жаңа-Семей жол дистанциясының мердігер компания «ПМС Астана» мекемесімен бірлесіп Жарма өңірінде жүргізіп жатқан желі бойындағы күрделі жөндеу жұмыстары, Семей және Өскемен станцияларындағы бағыттамалы бұрмаларды темірбетонды түрге ауыстыру шаралары да ешқандай кедергі тудырмаған.
