Достық станциясынан Қытайға 78 мыңнан астам вагон жүк жөнелтілді

Осы аптада «Үрімші темір жолы» ЖШҚ делегациясы Достық станциясына келіп, қазақстандық теміржолшылармен кездесті. Жиын барысында «ҚТЖ-Жүк тасымалы» ЖШС-на қарасты Достық станциясының ұжымы мен аталған делегация арасында екі елдің жүк тасымалына қатысты келіссөздер жүргізілді.

Кездесу кезінде шекара маңындағы темір жол жұмыстары бойынша 2023 жылдың 6 ай қорытындысы шығарылып, халықаралық жүктерді тасымалдау көлемін ұлғайту мәселелері талқыланды. Нақтырақ айтқанда, «Үрімші темір жолдары» ЖШҚ халықаралық ынтымақтастық бөлімі бастығының орынбасары Бай Лу мен Қазақстан тарапынан «ҚТЖ-Жүк тасымалы» ЖШС жүктермен коммерциялық жұмыстар департаментінің директоры Болат Сүлейменов екі жақты ынтымақтастықты дамыту мәселелері туралы ойларын ортаға салды. Іс-шараның бірінші күнінде үрімшілік делегация өкілдері Достық станциясын аралап, терминалдар жұмысымен танысса, келесі күні қазақстандық теміржолшылар Алашанькоу станциясына барып, ол жақтың да терминалдарын көрді. Екі жақ биылғы бекітілген жоспарды өз уақытында және артығымен орындауға дайын екендіктерін жеткізді.  

– Достық станциясынан Қытайға экспортталатын жүктер бойынша жоспарда 77147 вагон болса, іс жүзінде 78048 вагон жөнелтілді. Оның ішінде 54606 вагон – Қазақстаннан тиелген, 23442 вагон – транзиттік жүктер. Биылғы 6 айда өткен жылдың сәйкес кезеңіне қарағанда экспорттық жүктердің өсімі байқалады. Сонымен қатар импорттың да көлемі артты. Барлық міндеттер осы тасымал үдерісіне қатысы бар мекемелер қызметкерлерінің ұйымшылдығының арқасында сәтті орындалып отыр, – дейді Достық станциясының бастығы Мақсат Мәмбетқұлов.