Атырау жүк тасымалында пойыз қабылдау төмендеген

Атырау жүк тасымалы бөлімшесі бойынша биылғы жылдың жарты жылдығында аймақтағы тасымал көлемі техникалық жоспар бойынша 90 пайызға орындалыпты, бұл өткен жылдың осы мерзімімен салыстырғанда сәл де болса жоғары. Алайда, мұнайлы өңірде жүк айналымы бұрынғы қалпынан төмендеп бара жатқаны жасырын емес.

Өткен алты айда көп көрсеткіш кеміп кеткен. Оған орташа жүк тиеудің және тиелген жүк вагондарының кемуі, транзиттік тасымалдың азаюы себеп. Содан соң пропан, бутан, мазут, кокс, сера, ксилол тиеу азайып кетті, өйткені жүктерді экспортқа тиеуге конвенциялық тыйым қойылды. Сонымен қатар ішкі-сыртқы түйіспе жолдар бойынша вагондар саны, пойыз қабылдау азайған.  

Атырау – Қиғаш, Мақат – Құлсары бағытында жолды күрделі жөндеу жұмыстарының жүруіне байланысты жылдамдықты шектеуге 2138 ескерту, жол жөндеу машиналары мен ЭЧ, ШЧ мекемелерінің жұмыстарына байланысты 378 технологиялық «толаскез» берілген. Мұндай жағдайда пайдаланым жүк айналымымен қоса, жүк вагоны өнімділігі, вагонның орташа тәуліктік жүрісі, вагонның статистикалық салмағы, бір жүк операциясына вагонның тұруы, локомотив жүрісі, пойыздың учаскелік жылдамдығы, пойыздар қозғалысының техникалық жылдамдығы сынды басқа да көрсеткіштер төмендейді. Бөлімше бастығы А.Базарғалиевтің атап өткеніндей, өңірдегі станцияларда жүк операциясына және транзиттік вагондардың тұрып қалуы, сондай-ақ тастанды вагондар саны да артқан. Негізінен жеке тасымалдаушылардың локомотивтерінің жетіспеушілігінен осындай жағдайлар кездеседі. Пойыздардың уақытынан кешігуі де (1093) аз орын алмаған.  

Әйтсе де, негізгі қызмет бойынша (тасымал арқылы) қаржылай табыс көлемі былтырғы жылғы осы уақытқа қарағанда 52,6% немесе 9 млрд 702 млн 974 мың теңгеге артық болып отыр. Соның нәтижесі ретінде техникалық жоспарға сәйкес жүк тиеу 104,1 пайызға орындалған.