Семейде жүк айналымы артты

Шығыстағы Семей ЖТ бөлімшесі бойынша екінші жартыжылдықта жүк айналымының күрт артуы байқалады. Тасымалданатын тауарлар арасында көмір, құрылыс материалдары мен астықтың үлесі зор. Сонымен қатар соңғы айларға жасалған сараптама контейнерлік тасымал түрінің де біршама жоғарылағанын көрсетіп отыр.

Мәселен, соңғы бір аптаның ішінде бөлімше бойынша жалпы көлемі 336 020 тонна жүк діттеген жеріне жеткізілген. Оның ішінде Дегелең станциясынан тиелінетін көмір алдыңғы орында тұр. Қатты отынның да сұраныстың артуына сай көлемі артып, өткен жылдың есепті мерзімімен салыстырғанда анағұрлым жоғарылапты.

Сол тәрізді бөлімше бойынша тиелетін түсті металл мен цемент, металлоломның да салмағы айтарлықтай өсіп отыр. Ал жаңадан қосылған маусымдық жүктер арасында астықтың үлесі жоғары. Жалпы көлемі 4 607 тонна ақ бидай вагондар арқылы аймақтың әр түкпіріне жол тартыпты.  

Бөлімшенің өндірістік-техникалық бөлімінің мамандары бұл көрсеткішті жоғары бағалап отыр. Оның себебі – қазіргі таңда бөлімше көлемінде жазғы жол жөндеу жұмыстары қарқын алып, толаскездер жиі орын алуда. Ал жергілікті жүктердің айналымы осының барлығына қарамастан кедергісіз орын алуда. Пойыздарды көршілес бөлімшелерге беру, қабылдап алу ісінде де іркіліс жоқ. Сол тәрізді кестеден кешікпеу жолаушылар пойыздарына да тән жағдай. Бұл орайда өткен апта ішінде 14 084 адам әр бағытқа жол тартыпты.

– Жазғы қозғалыс барысын ұйымдастыру өзіндік тың талап-ережелерді қажет етеді. Тораптық станциялардағы пойыздарды құрастыру мен сұрыптау процестерін реттеу, жөнелту тәртібін қайта қарастырып, жаңа бағыттар қосу – қосымша күшті те талап етеді. Сонымен қатар аталмыш шаралар аясында логистика саласы мамандары үшін тасымалданатын жүктердің аман сақталуы да маңызды тақырыпқа жатады. Бұл орайда бірінші жартыжылдық қорытындысына арналған селекторлық жиын барысында атап айтылғандай, соңғы айларда жетістік көп. Оның барлығы әлбетте атқарылып жатқан жұмыстардың басшылық назарында ұсталынып, ұйымдастыру шараларының дұрыс бағытта жүргізіліп жатқандығы себепті орын алып отыр, – дейді осы ретте пікір білдірген бөлімшенің өндірістік-техникалық бөлімінің мамандары.  

Дегенмен семейлік қозғалысшылар үшін сыналар шақ алда. Енді санаулы күндерден соң, яғни қыркүйек айының басталуымен бөлімше көлемінде Дегелең станциясынан көмір тасымалдау ісіне айтарлықтай деңгейде басымдық берілетін болады. Оған «Қаражыра» АҚ мен деңгейлік әкімдіктердің арнайы меморандумға отыруы себеп. Семейдегі «Теплокоммунэнерго» ЖШС-ның өзі аймақтағы ең ірі тапсырыс берушіге жатады. Ал осынау жұмыстар аясында екі жақтың да теміржолшыларға жиі кінә артып, «вагон жетпей жатыр» дегенді желеу ететіні белгілі. Сондықтан да, бөлімше көлеміндегі жүк айналымын реттеу ісі қайта қарастырылып, қажетті жағдайда қосымша шаралар қабылданатын болады. Яғни семейлік қозғалысшылар мен логистика саласының мамандарына тағы да күш салуға тура келетіні анық жайт.