Теңіз порттары арқылы тасымалданатын жүк айналымы артты
«Қазақстан теміржолшысы» газетінің тілшісі
Биылғы жылғы қаңтар-тамыз аралығында Ақтау және Құрық теңіз порттары арқылы тасымалданатын жүк айналымының өсімі 12% құраған. Айта кетерлігі, Транскаспий халықаралық көлік бағдары бойынша өсім 80 пайызға жетіп отыр.
Оның ішінде мұнайды ауыстырып тиеу бойынша ең жоғары өсім – 53%, сондай-ақ пароммен тасымалдау – 12%. Биыл қыркүйек айында Abu Dhabi Ports Group қатысуымен қазақстандық Semurg Invest компаниясы салған Құрық портындағы жаңа терминалдан астықтың бірінші партиясын жөнелту жоспарланып отыр.
Мемлекет басшысының тапсырмасына сәйкес еліміздің көлік-логистикалық әлеуетін арттыру мақсатында 2023 жылдың ақпан айынан бастап Ақтау теңіз сауда порты және оған жататын «Баутино» жүк ауданы, «Құрық портының аумақтары «Ақтау теңіз порты» АЭА құрамына енгізілген. Оның аясында порттардың инфрақұрылымын дамыту шараларымен қатар экономикалық аймақта 2025 жылдың соңына дейін контейнерлік хаб құру көзделген. Порттардың экономикалық аймаққа қосылуы өңірге елеулі әлеуметтік-экономикалық әсер етеді және облысқа инвестициялар тарту үшін қолайлы алаңға айналдырып қана қоймай, ірі халықаралық көлік дәліздерінің бірі болуына үлес қосады. Сонымен қатар порттарға әлемнің үздік логистикалық компанияларымен жұмыс істеуге жол ашады.
Ақтау теңіз порты – құрғақ жүктер, мұнай және шикі мұнай өнімдерін шығыстан батысқа, солтүстіктен оңтүстікке, сондай-ақ Әзірбайжан, Иран, Түркіменстан, Ресей елдеріне жүк тасымалдайтын айлақ. Ақтау портында жылдық қуаты 12 млн тонналық 6 мұнай айлағы жұмыс істейді. Ақтау портының тасымалдау үлесі Каспий теңізіндегі жалпы тасымал көлемінің 40%-ын құрайды. Қазіргі таңда Қазақстан Ақтау порты арқылы халықаралық көлік дәліздерінің түйініне айналған.
Құрық портында 4 айлақ жұмыс істейді. Оның екеуі темір жол арқылы келген жүктерді паромға тиеуге арналса, қалған екеуінен көліктер түсіріледі. Порттың қызметін дамытып, жүк тасымалын одан әрі арттыру үшін тағы бір айлақ салу жұмыстары жүргізілуде. Ол арқылы салмағы ауыр жүктер мен контейнерлер тасымалданбақ. Сондай-ақ 2024 жылдан бастап қазақстандық паромдарды қабылдау жоспары бар. Бұл өз кезегінде Ресей және Иранның екі портымен жаңа маршруттардың ашылуына түрткі болмақ. Қазіргі геосаяси жағдайға байланысты Құрық портында жүк тасымалы артқан. 2023 жылдың басынан бері мұнда 550 мың тоннадан астам жүк тасымалданған. Бұл өткен жылдың осы кезеңімен салыстырғанда 2 есе көп.