Маңғыстаулық теміржолшылар жүк айналымы жоспарын асыра орындады

Маңғыстаулық теміржолшылар өткен сегіз айда жүк айналымы жоспарын асыра орындап, тасымал үдерісінің жақсаруына үлес қосқан.

Мәселен, өткен сегіз айда жүк айналымы жоспары бастапқыда 4 486 000 тоннаға жоспарланса, алайда оның орындалуы 5 150 000 тоннаны құраған. Жүк тиеу көрсеткіші де көтеріңкі, яғни меже 111,8 пайызға орындалып, 2 116 000 тонна жүк тиелген. ТХКБ бағытында да едәуір ілгерілеушілік бар. Жыл басынан қыркүйекке дейін 11 599 контейнер ауыстырылып тиелген. Оның 8 309 контейнері Ақтау портында жүзеге асқан. Құрық портынан жіберілген кемелер саны өткен жылдағы салыстырмалы мерзімдегіден алпыс кемеге көбейген. Яғни 480 паром жөнелтілген. Мұндағы ауыстырып тиеудің көрсеткіші 1 миллион тоннадан асқан.  

– Биыл көктемнің басында Маңғыстау қосалқы бөліміне диспетчерлер беріліп, жұмыс жандана түсті. Олар ауысыммен күні-түні еңбек ететіндіктен келіп жатқан жүктер, пойыздар толық бақылауда. Бұл жұмыстарды Ақтөбенің диспетчерлік орталығымен бірлесе атқарудамыз. Алдымен шұғыл өтуі керек жүк вагондарын жөнелтеміз. Жұмыстар жалпы оң нәтиже беруде. Диспетчерлер Болашақ арқылы Түркіменстанмен пойыз алмасуды да бақылауға алған. Бұл бағытта былтыр күз айына дейін Түркіменстан теміржолына 421 пойыз тапсырған едік. Биыл 500 пойызға жеткіздік. Сол сияқты қабылданған пойыздар саны да өткен жылдағыдан 34-ке артты немесе 202 633 тоннаны құрады, – дейді Маңғыстау қосалқы бөлімінде логистика бөлім басшысы Айбек Өтеков.  

Маңғыстаудағы порттарға қатысты жаңа жобалардың жүзеге асырылуы алдағы жылдары тасымал көлемін одан әрі арттыра түсетіні анық. Құрық портындағы жұмыс қазірден қыза түскен. Портқа 1 миллион тонна ауыстырып тиеу мүмкіндігі бар астық терминалы салынайын деп жатыр. Оған қоса порттың жанынан сұрыптау станциясы ашылады. Қазір сол жұмыстар жүргізілуде. Сұрыптау станциясы жұмысын бастаса, Маңғыстау станциясындағы жұмыстар біраз жеңілдейді. Өйткені Құрық портына сұрыптау жұмыстарын қазір осы станция атқаруда.