Қазан айында Сарыағаш түйіспесі арқылы 670 мың тоннадан астам астық тасымалдау келісілген
Заңнамаға сәйкес тасымалдаушы жүк жөнелтушілердің теміржол көлігі жүкқұжатында көрсеткен мәліметтерінің дұрыстығын тексеруге және жүк жөнелтушіден, жүк алушыдан тасымалдау мәртебесін айқындау мен тарифті есептеу үшін жүк транзиті кезінде тауарға ілеспе құжаттардың көшірмелерін алуға құқылы.
Жүк жөнелтуші тауарға ілеспе құжаттарды, оның ішінде сертификатты, лицензияны, ветеринариялық сертификатты, кедендік декларацияларды жөнелту станциясында ұсынады.
Егер құжаттарға толық емес және (немесе) сәйкес келмейтін мәліметтер анықталса, жүк жөнелтуші жаңа көлік жүкқұжатын жасайды. Оны ресімдегенге дейін тасымалдаушы жүкті қабылдаудан бас тартады.
Сондай-ақ, 2023 жылдың қазан айына Сарыағаш түйісуі арқылы Орталық Азия елдері мен Ауғанстанға 1,9 млн тоннадан астам жүкті, оның ішінде 670 мың тоннадан астам астықты тасымалдау көлемі келісілгенін хабарлаймыз. Қазіргі уақытта жоспарды игеру жүк жөнелтушілердің жүктерді бермеуіне байланысты 50% аспады. Осыған қарамастан, Өзбекстан арқылы 70 мың тонна астық жүктерін тасымалдаудың қосымша көлемін келісу туралы шешім қабылданды. ҚХР-ға жүктерді тасымалдауға арналған қосымша өтінімдер қытайлық тараптың қарауында.
Бұдан басқа, Қазақстан Республикасы Бас көлік прокуратурасының осы үшін жабдықталған станцияларда контейнерлік вагондарды тиеу және түсіру жөніндегі телеграф нұсқауларының күшін жою туралы наразылығы Қазақстан Республикасы заңнамасы талаптарына қатаң сәйкестікте және белгіленген мерзімде орындалды.