Достық станциясында экспорттық жүк жоспары мерзімінен бұрын орындалды
«Қазақстан теміржолшысы» газетінің тілшісі
Үстіміздегі қараша айының 13-і күні Достық станциясы арқылы 173 005 вагонмен 10 064 448 тонна жүк көрші Қытай еліне экспортталып, межелі жоспар 1,5 ай бұрын орындалды. Мұны «ҚТЖ» ҰК» АҚ-ның үлкен жетістігі деп бағалаған жөн.
«Алдын ала жасалынған жоспар бойынша бұл көрсеткішті біз жылдың соңында бағындыруымыз керек еді. Бірақ, тапсырманы станция ұжымының ауызбіршілігі, жоғары ұйымдастырушылық еңбегі арқасында уақытынан бұрын орындап отырған жайымыз бар. Достық станциясы климаты өте күрделі аумақта орналасқан. Ауа-райы жұмыс процесіне қолайсыздық тудырып жататын жағдайлар жиі болып тұрады. Соған қарамастан станция қызметкерлері өз міндеттерін мінсіз атқарып, жауапкершілік жүгін абыроймен арқалауда», – дейді станция бастығы Мақсат Мәмбетқұлов.
Оның айтуынша, экспорттық жүктер әртүрлі вагондармен тасымалданған. Олардың арасында контейнерлер, жабық вагондар, астықтасығыштар, тағысын тағы құрамдар бар. Және де жылжымалы құрамдар кең жол табанымен жөнелтіліп отырған. Экспортталған жүктердің номенклатурасына келсек, олар қазақстандық гематит, концентрат, кокс, мыс, ферро қорытпасы, феррохром, цинк, калий, астық, май түрлері, азық-түлік тауарлары екен. Экспорттық тасымал жоспардың орындалғанына қарамастан жылдың соңына дейін жалғаса бермек.
Достық мемлекетаралық шекаралық станциясында пойыздарды өңдеу технологиясын жетілдіру, станцияның техникалық процесіне қатысатын барлық қызметтердің пойыздарды тасымалдау құжаттарын өңдеу уақытын қысқарту, жүк тиеу терминалдарының өндірістік қуатын арттыру бойынша жұмыстар жүргізіліп жатқанын атар едік. Бұл атқарылып жатқан шаруалар екі ел арасындағы жүк айналымының ұлғаюына сөзсіз септігін тигізері анық.
«Достық станциясы Қытай мен Еуропа арасындағы халықаралық транзиттік теміржол тасымалының мемлекетаралық негізгі байланыстырушы пункттерінің бірі. Сондықтан бізге станцияны техникалық дамыту бойынша іс-шараларды әзірлеу, сондай-ақ теміржол көлігімен тасымалданатын жаңа көлемдерді игеру сияқты ауқымды міндеттер мен орасан зор жүктеме жүктеліп отыр »,– дейді станция бастығы.