Былтыр Болашақтан жіберілген жүк пойыздары 31-ге артқан

Болашақ станциясы – Қазақстан теміржолы тарихында іске асырылған сәтті жобалардың бірі. Станция ашылғалы тасымалдау саласында жаңа бағыттар іске қосылып, жүк айналымы жақсарып келеді. Мәселен, былтыр станцияға Түркіменстан теміржолымен келетін импорттық жүктер көлемі жүз тоннаға артқан.

Яғни 2022 жылы Түркімен теміржолынан елімізге жеті жүзге жуық пойыз келіп, онымен 223 918 тонна жүк тасымалданған болса, былтыр көрші елден 303 872 тонна жүк жеткізілген. Ал кері бағытта, Қазақстаннан Болашақ арқылы Түркіменстанға 1 млн 906 360 тонна жүк жөнелтілген. Бұл 2022 жылғы көрсеткішке қарағанда сәл аздау. Дегенмен станциядан өткізіліп, қызмет көрсетілген пойыздар мен вагондар саны көбейген. Өткен жылы Болашақтан жіберілген жүк пойыздары 31-ге артқан. 

Болашақ станциясының бастығы Мақсат Нұрбековтің сөзінше бұл аталған пойыздардың барлығына белгіленген стандарт бойынша қажетті қызмет көрсетіліп, уақытылы қозғалысы қамтамасыз етілген. Осы міндеттерді атқаруға бір кісідей жұмыла кірісіп жүрген станциялықтар еңбекте де, қоғамдық жұмыста да белсенді. Станция басшысы өткен жылы «Үздік басшы» атанса, қызметкерлерінен Серік Бөрібаев Маңғыстау бөлімшесі бойынша «Үздік қызметкер» номинациясымен марапатталды. Техникалық бөлім басшысы Жолдасбай Арыстанбаев пен тауар кассирі Ануар Жақсыбаев Астанада өткен III республикалық семинар-тренингінде Маңғыстау командасының құрамында қатысып, бірінші орын алды. Олар оған дейін Батыстағы іріктеуінен іркілмей өтіп, Астанаға жолдама жеңіп алған. 

– Станция ұжымы үшін өткен жыл табысты болды. Болашақтың берекесі жылдан-жылға артып келеді. Былтыр ғана он жылдығын атап өткен жас станциямыздың болашағы алда. Биылғы жылды да табысты өткізуге барлық күш-жігерімізді жұмсайтын боламыз, – дейді Болашақ станциясының бастығы Мақсат Нұрбеков.