Қазақстан мен Румыния Транскаспий дәлізін бірігіп дамытуға мүдделі

Қазақстан мен Румыния көлік министрліктері Транскаспий халықаралық көлік маршрутын одан әрі дамыту бойынша ынтымақтастық туралы келісті. ҚР Көлік министрі М. Қарабаев Бухарест қаласында Румынияның көлік және инфрақұрылым министрлігінің басшысымен кездесу өткізді.

Марат Қарабаев пен Сорин Гриндяну көлік және логистика саласындағы екіжақты ынтымақтастық мәселесін талқылады. Атап айтқанда, Транскаспий халықаралық көлік бағдары шеңберіндегі жобалар талқыланды. Қазақстанның көлік министрі Транскаспий халықаралық көлік маршрутының рөлі күн санап артып келе жатқанынын жеткізіп, Қара теңіз бен Еуропаның басым бөлігінің арасында орналасқан Румыния мемлекетінің Орта дәліздің әлеуетін арттыру барысындағы маңыздылығын ерекше атап өтті.  

– Біз транзиттік жүк тасымалы көлемін өзара арттыру әрі мультимодалдық тасымалдар мен логистикалық үрдістер саласында тәжірибе алмасу мақсатында ынтымақтастығымызды одан әрі нығайтуға ниеттіміз. Қазақстан мен Румыния халықаралық көлік дәлізін дамыту бойынша халықаралық келісімнің қатысушылары екенін ескеретін болсақ, аталған дәліз бойындағы ынтымақтастықты одан әрі арттыруға қызығушылық танытып отырғанымыз орынды, – деді Марат Қарабаев.  

Көлік министрі бастаған қазақстандық делегация Румынияға сапары аясында Констанца портындағы көлік-логистикалық бизнес-форумға және халықаралық автомобиль тасымалдары жөніндегі бірлескен комиссияның отырысына қатысты.

Аталған форум аясында Румынияның бизнес өкілдерімен В2В форматында кездесулер өтті. Сонымен қатар, қазақстандық делегация Констанца қаласындағы Румыниядағы ірі порттың қызметімен де танысты. Констанца портының мүмкіндіктері мен артықшылықтары Транскаспий халықаралық көлік маршрутының әлеуетін ашуда, сондай-ақ транзиттік жүк ағындарының көлемін өзара ұлғайту және мультимодальды тасымалдар мен логистикалық процестер саласындағы озық тәжірибемен алмасу үшін Қазақстан мен Румыния арасындағы ынтымақтастықты одан әрі нығайтуда маңызды рөл атқара алады.  

Іс-шараларға Қазақстан тарапынан вице-министр Талғат Ластаев, теміржол және су көлігі комитетінің төрағасы Олжас Сапарбеков, «KTZ Express» АҚ, «Ақтау теңіз сауда порты» ҰК, «Транскаспий халықаралық көлік маршрутының» халықаралық қауымдастығы, Semurg Invest, Dar Rail және PTC Holding ЖШС басшылығының өкілдері қатысты.