Қызылордада көмір тасымалының жоспары артығымен орындалды
Қызылорда облысы бойынша меншікті тілші
Қызылордада көмір тапшылығы жоқ, жол бойындағы қоймаларда қатты отын қоры жеткілікті. Ақпан айындағы жағдай бойынша көмір тасымалының жоспары 123,1 пайызға асыра орындалып, қоймалардағы қор еселене түскен.
Жалпы «ҚТЖ-ЖТ» серіктестігі «Батыс» филиалы Қызылорда қосалқы бөлімі бойынша 2023-24 жылғы жылу маусымындғы көмір отынына кажеттілік – 237 700 тонна. Осы көлемдегі көмір отынын тасымалдаушы кәсіпорындармен келісімшарт түзіліп, жеткізуші заңды тұлғалар былтырғы мамыр айынан бастап тасымалдауға кіріскен. Тапсырыстар мамырдан наурызға дейін әр айға тасымалдану мөлшері бекітіліп берілген. Мәселен ақпандағы 6445 тонна көмірге берілген тапсырыс орнына 7935 тоннасы түсіріліп, жоспар асыра орындалып отыр. Және де бұл ақпан айының 21 күніндегі қол жеткізілген нәтиже көрінеді. Жалпы көмір тасымалы, 20-25 мың тонна мөлшерінде күз айларында қарқынды ұйымдастырылыпты.
– Жергілікті әкімдіктің бекіткен кестесіне сәйкес көмір тасымалы әр айға ықшамдалып тұрақты жүргізілуде. Ай сайынғы тасымал жоспары орындалып отырғандықтан аймақ бекеттеріндегі көмір қоймаларында қатты отынға деген тапшылық болған емес. Мысалы бүгінгі күнгі мәліметке сүйенсек, Сексеуіл станциясында 276 тонна көмір, Арал теңізі бекетіндегі қоймаларда 1932 тонна, Қазалы станциясында 4072 тонна, Жосалыда 404 тонна көмір болса, Шиелі станциясындағы көмір сақтау орындарында 9104 тонна көмір қоры бар, – дейді бөлім басшысы Нұрлан Жайсаңбаев.
Аймаққа келген көмір отыны негізінен Шұбаркөл көмір, Восток Уголпром, Майкубен секілді кәсіпорындардан жөнелтіледі. Әлеуметтік желілерде «көмір тапшы» деген алыпқашпа жазбаларда негіз жоқ екенін дәлеледеу үшін нақты мәліметтерді ұсынып отырмыз.