Өзбекстанмен арада жүк тасымалында өсім байқалады
«Қазақстан теміржолшысы» газетінің тілшісі
Қазақстанның Өзбекстандағы елшісі Бейбіт Атамқұлов Өзбекстанның Көлік министрі Илхом Махкамовпен жұмыс аясында кездесті. Тараптар 2023 жылдың жұмысын қорытындылады.
Кездесуде тараптар ҚР Президенті Қасым-Жомарт Тоқаевтың 2022 жылы желтоқсанда Өзбекстанға мемлекеттік сапарының қорытындысы бойынша қол қойылған транзиттік-көліктік және логистика салаларына қатысты жол картасын іске асыру мәселесін талқылады. Екі ел арасында теміржол және автомобиль көлігімен жүк тасымалы көлемінің өсу динамикасы байқалғаны аталып өтті. 2023 жылы Қазақстан мен Өзбекстан арасындағы теміржол арқылы жүк тасымалының жалпы көлемі 17,2%-ға өсіп, 31,4 млн тоннаны құраған. Сонымен қатар жүк тасымалы бойынша темір жол және автомобиль көлігінің өзекті мәселелері, Қазақстан мен Өзбекстан қалалары арасындағы халықаралық бағыттар бойынша жолаушылар тасымалының қауіпсіздігін қамтамасыз ету талаптарының бірыңғай стандарттарын әзірлеу қажеттілігі, жаңа әуебайланыстарды ашу мәселелері сөз болды.
Қорытындылай келе, сауда және тауар айналымының және транзиттік жүк тасымалының жыл сайынғы өсуін, сондай-ақ Қазақстан мен Өзбекстан арасындағы тауар айналымының 10 млрд АҚШ долларына дейін күтілетін өсімін ескере отырып, тараптар мемлекеттер арасындағы көлік инфрақұрылымын кеңейту және жетілдіру қажеттігін атап өтті.