Маңғыстау теміржолымен биыл 2,4 млн тонна жүк өткен
Маңғыстау облысы бойынша меншікті тілші
Жыл басынан бері Маңғыстау теміржолында жүк тасымалы көрсеткіші айтарлықтай өскен. Төрт айда түбек теміржолымен 2 млн 420 мың тонна жүк өткен, нәтижесінде жүк айналымы 106,8 пайызға орындалған. Атап өтерлігі, ТХКБ (ТМТМ) маршрутымен контейнерлік тасымалдау былтырғы көрсеткішпен салыстырғанда 86 пайызға көп.
Жүк тиеу бағытында мұнай өнімдерін, қара металл сынықтарын, құрылыс жүгі мен химикат және сода жөнелтілімі анағұрлым артқан. Өткен қыс мезгілінің қолайсыз келіп, ауа райының құбылмалы болуы жылдың басында жергілікті құрылыс жүктеріне деген сұранысты төмендетіп, жүк тиеу көрсеткішін азайтқанымен, жалпы тасымалдау процесі қарқынды жүріп, жоспар артығымен орындалған.
Мәселен жүк тиеу бойынша күніне орташа есеппен 97 вагон тиелу керек болса, ол 104 вагонға жеткізіліп, төрт айда 726 мың 500 тонна жүк жөнелтілген. Бұл жоспардағыдан 58 мың 500 тоннаға көп. Жүк тиеуге қатысты тағы бір жағымды көрсеткіш – ел ішіндегі жүк айналымының артуы. Өткен төрт айда Маңғыстаудан тиелген 11 690 вагонның 82,3 пайызы еліміздің өзге аймақтарына бағытталған екен. Тек қалған 18 пайыздайы ғана шетелге жөнелтілген.
Жүк түсіру бағытында да ілгерілеушілік байқалады. Тәулігіне жоспардағы 192 вагонның орнына 218 вагон түсіріліп, жоспар 113,5 пайызға орындалған.
– Өңірдегі жүк тасымалы үдерісі қарқынды жүріп жатыр. Былтырғыға қарағанда ТМТМ бағдарымен су көлігі арқылы контейнерлік тасымалдау да көбейді. Өткен жылғы төрт айда бұл бағытта 13 кеме жіберілген еді, қазіргі салыстырмалы мерзімде 29 кеме жіберіп отырмыз. Онымен 7133 контейнер жөнелтілді. Жылдың басынан мамырдың 25-не дейін бұл көрсеткіш тағы да ұлғайып, 9883 контейнерге жетті. «Алтынкөл» бағыты да бізге келіп жатқандықтан жүк жөнелтілімі күн сайын жоғарылауда. Сонымен қатар қазірде жергілікті жүктер де бұл қатарды толықтырып отыр. Ақтау портынан «КазАзот» зауыты жаңа бағыт ашып, аммиак селитрасын шығаруда. Селитраны кемелерге бигбек қапшықпен тиеп жібереді. Осы жылдың ақпан айында бірінші кемесін жөнелтті. Жылдың аяғына дейін осындай 16 кеме жібереміз деп отыр. Сол бағыт бойынша Құрық порты арқылы вагонмен 200 вагон немесе 13 250 тонна жөнелтуге жоспар алған болатын. Соның 127 вагоны Құрық портынан паром арқылы ТМТМ маршрутымен жіберілді. Оған қоса былтыр қыркүйектен бастап жұмысқа кіріскен портқа дейінгі станция арқылы өткен жүктер көлемі де жоғарылап келеді. Станция ашылғалы 439 жабық вагон түсірдік. Бұл жерден былтыр ашылған күннен бастап жыл соңына дейін 26 мың тонна жүк жіберілді. Ал осы төрт айда ол едәуір өсті, 31 мың 688 тоннаға жетті. Мамырдың 27 күні ішінде бұл бағытта 3762 мың тонна жүк түсірілді. Құрық порттың да ауыстырып тиеуі артты. Өткен жылы мамыр айына дейін осы бағытпен 203 кеме жөнелтсек, биыл бұл мерзімде 225 кеме немесе былтырғыдан 13 мың тонна жүк артығымен кетті, – дейді аймақ тасымалы туралы жан-жақты ақпар берген Маңғыстау қосалқы бөлімінің логистика басшысы Айбек Өтеков.
Айтуынша, Болашақ арқылы Түркіменстанмен пойыз алмасуда да көрсеткіш жаман емес. Тәулігіне орта есеппен екі пойыз тапсырып, екеуі қабылданатын бұл бағытта осы жылғы төрт ай ішінде 110 мың 823 тонна жүк қабылданған. Түркіменстанға қарай 175 пойыз-431 мың тонна жүк жөнелтілген.
Жалпы түбек теміржолына жүк пойыздары төрт түйіспе бойынша: Тассай – Ақтөбе, Құлсары – Атырау, Болашақ – Түркіменстан, Қарақалпақия – Орта Азия бағытынан келеді. Биыл осы аталған бағыттардан Маңғыстауға 715 пойыз қабылданып, 594 пойыз тапсырылыпты.
Логистика маманы Айбек Өтеков Маңғыстау теміржолының жүк айналымында жоғары көрсеткіштерге жетуінің бірнеше факторы бар дейді. Ең алдымен компанияның және жерілікті теміржол басшылығының қолдауымен клиенттерге жасалып отырған қолайлы мүмкіндіктер. Мәселен, өткен жылдан бері бөлімшеде диспетчерлік аппарат қайта ашылды. Сондай-ақ жалпы клиенттерге арналған колл-орталық жұмыс істеп тұр. Теміржол қызметін тұтынушылар кез келген сұрақпен күніне 24/7 сағат бойына екі телефон нөміріне хабарласып, ақпарат ала алады. Сонымен қатар Қазтеміртранстың вагондарын қолданушылар үшін арнайы жеңілдіктер берілуде. Өңірге жеткізіліп жатқан жем-шөптер үшін де проценттік коэффициенттер төмендетілген.
– Клиенттер «Қазтеміртранстың» вагонын алса, оған арнайы мүмкіндіктер қарастырылғаны ескертіледі. Бұл олар үшін өте қолайлы. Себебі бұрын жүктерін уақытылы түсіре алмай, тупикте тұрып қалса, артық кеткен уақытына ақы төленетін. Енді оларға екі тәуліктік жеңілдік беріледі. Осы мекеменің вагондарымен өзіміздің Бейнеу, Маңғыстау сияқты станцияларға жүк келіп жатса, оларға да екі тәуліктік жеңілдік бар. Сол уақыт ішінде жүкті түсіріп, вагонды босатып берсе, ешқандай айыппұл төлемейді, – дейді логистика бөлімі басшысы.