Жіңішке жүк станциясының бүгінгі жай-күйі
Ақтөбе облысы бойынша меншікті тілші
Қауіпсіздік мәселесі аса қауіпті теміржолдың бойында өте өзекті. Ал Жіңішке сынды жүк станциясында қауіп-қатер екі есе артады. 60-тан аса кірме жолы бар станциядан өңірдегі үлкен зауыттардың жүк тасымалы ұйымдастырылады.
Жуырда Жіңішке станциясының қауіпсіздік бойынша инженерлері облыстық ТЖД қызметкерлері, «Қызыл ай» қоғамы нұсқаушыларымен бірлесіп жергілікті тұрғындармен кездесу өткізді. Шара барысында сөз алған мамандар темір жолда, автожолда қауіпсіздікті ескеріп, қарапайым жүріп-тұру ережелерін сақтау қажеттігін, жаз маусымы басталуымен өрттен абай болуды ескертті.
Жіңішке жүк станциясы күн сайын төрт жүк пойызын қабылдап, тағы төртеуін жөнелтеді. Ауыр жүк вагондарының қозғалысы жиі. Станцияның екі жақ бетінде елдімекендер орналасқандықтан теміржолшылар қауіпсіздік тақырыбында рейд пен кездесулерді жиі өткізеді. Себебі тұрғындар арасында темір жолды белгіленбеген жерден кесіп өтушілер аз емес.
«Станцияда 60-тан астам кірме жол бар. Халықаралық деңгейде жүк жөнелту жұмыстарын ұйымдастыратын станцияда күніге 300 вагонға дейін жүк тиеледі. Ақтөбе рельс-арқалық зауытының өнімдерін тасымалдайтын Қызғалдақты станциясының жұмысы да осы жерден ұйымдастырылады. АРБЗ өнімдерін елдің барлық аумағына жөнелтеді. 100 метрлік рельстер күнделікті тиеледі. Қысқасы, жүк пойыздарының қозғалысы өте жиі. Сондықтан тұрғындардың қауіпсіздігіне алаңдаймыз, белгіленбеген жерді кесіп өтіп, жолды қысқарту дұрыс емес, әр адам өз қауіпсіздігіне жауапкершілікпен қарау керек, ауыр локомотивтерді шұғыл тоқтату мүмкін емес деп айтудай-ақ айтамыз, бірақ оны тыңдайтын да, тыңдамайтын да бар», – деді Жіңішке станциясының инженері Анар Мұқанова.