Семей станциясында жүк тиеу, түсіру жұмыстары артты
Абай облысы бойынша меншікті тілші
Семей станциясы бойынша жүк тиеу мен түсіру жұмыстары жылдың екінші жартыжылдығында ширай бастады. Әсіресе контейнерлік тасымалға ерекше ден қойылуда. Бұл орайда жүк цехында қарбалас көп...
Логистика саласында ұзақ жылдық еңбек өтілі бар құрметті теміржолшы Болат Өтегенов басқаратын кластан тыс станция бойынша жүк айналымының артуына байланысты бірқатар тың шаралар қабылданған. Соның ішінде әсіресе станция басында құрастырылатын контейнерлік пойыздарға басымдық берілуде.
Мәселен, өткен тамыз айында мұнда жалпы салмағы 39 692 тонна болатын 619 вагон құрастырылып, жолға шығарылыпты. Оның ішінде жекелей тоқталсақ, 372 контейнерден тұратын бес контейнерлік жылжымалы құрамдар бар. Контейнерлік пойыздарды жөнелтудегі негізгі бағыт – көршілес Қытай елі.
Десек те, жүк түсіру жұмыстары бұрынғыша көш басында тұр. Өткен бір ай ішінде станциядан 1069 вагон жүк түсірілген.
– Мұның барлығы – орта есеппен алғандағы көрсеткіштер. Станцияның әлеуеті зор, бір мезгілде бұдан да жоғары көлемдегі жүк айналымын жүргізе алады. Оған барлық мүмкіндік қарастырылған, – дейді станция бастығының логистика бойынша орынбасары Болатбек Ешмұратов.
Кейде бір ауысымда жалпы саны 70-80 вагоннан аса жүк тиеп, 40-50 вагон жүк түсірілетін кездер де болады. Бұл әсіресе тасымал қарқыны артқан күзгі мезгілге тән жайт. Мәселен, қазіргі уақытта астық тасымалы күрт қарқын алған. Сол тәрізді «Семей силикат» зауыты өнімдерінің де үлес салмағы артуда. Ал түсірілетін жүк арасында Шығыс Еуропадан, Беларусь елінен жеткізілетін жиһаздар көп.
Мұнымен қатар автокөлік қатынасы қиындайтын қысқы мезгілде азық-түлік, тіпті кондитерлік өнімдер мен сусындар да жылжымалы құраммен тасымалданады.
Сәйкесінше соңғы уақыттарда техникалық контордағы жүк тасымалы құжаттарын өңдеу ісі қарқын алған. Сол тәрізді жүк цехындағы 21 қызметкер де уақытпен жарысып еңбек етуде. Өндірістегі өнімділікті арттыру барысында АСУ бағдарламасымен іс жүргізуді қоса алғанда хаттамалық құжаттама жұмыстар да аса маңызды саналады.
Станциядағы аға жүк қабылдап-тапсырушы Данагүл Өтеленованың жетекшілігімен ауысым бойынша атқарылатын іс-шаралар күнделікті өтетін лездемелік жиындар барысында толықтай пысықталып отырады. Жүк айналымын тұрақты жүргізуде құжаттарды өңдеу мен рәсімдеу ісінің де маңызы аса зор. Сол тәрізді жоспарлы шараларды орындауда да станциядағы жүк қабылдап-тапсырушылар мен тауар кассаларындағы, жүк цехында қызмет ететін қыз-келіншектердің еңбектері орасан екендігін айта кеткен жөн. Бұл ретте әр айға жеке жоспар жасалып, көзделген меже аясында нақты іс-шаралар қолға алынады. Жүк тиеу мен түсіру ісіндегі әр күнгі көрсеткіш, клиенттерден түсетін тапсырыстар көлемі әртүрлі болғанымен, тораптық Семей станциясының теміржолшылары үшін мақсат пен міндет ортақ. Ол – белгіленген үдеден шыға білу.