Трансеуразиялық транзит перспективасы қандай?

Қазақстандағы транзиттік тасымалды дамыту перспективалары мен қазіргі мүмкіндіктері туралы «KTZ Express» АҚ жаңа жобалар және маркетинг жөніндегі атқарушы директоры Әсем Мұхамедиева айтып берді.

Мәлімдеуінше, биыл елімізде 8 айда транзиттік тасымал көлемі 20 футтық эквивалент бойынша 350 контейнерге жеткен. Өткен жылдың сәйкес кезеңімен салыстырғанда Қытай-Еуропа-Қытай бағдарында тасымал көлемінің артқаны байқалған. ТХКБ бойынша да тасымал айналымы қарқынды өсіп жатыр.  

– Өткен 8 айда алдыңғы жылмен салыстырғанда ТХКБ бағдарында тасымал көлемі 10 есе артты. Жалпы жүк тасымалының артуында оң динамика бар. Компания осы бағытта жаңа логистикалық сервистер құру үшін қарқынды жұмыстар жүргізуде. Биыл Трансауған бағыты бойынша тауар жөнелтуде қанатқақты жоба іске қосылды. Қазақстаннан шығатын Трансауған дәлізі арқылы Павлодар қаласынан Джабаль-Али портына дейін контейнерлер жөнелтілді, ол Өзбекстан, Түрікменстан аумағынан өтіп, БАЭ портына дейін 34 тәулікте жетті. Бұл мультимодальды бағдар компаниядағы тариф шарттарының бәсекеге қабілеттілігін қамтамасыз етеді, – дейді Ә.Мұхамедиева.  

Қазір аталған компания Ақтау порты базасында қытайлық әріптестермен бірге контейнерлік хаб құрылысын жүргізуде, бұл ТХКБ орта дәлізін дамытуда маңызды жоба саналады, яғни Ақтау портының Каспий теңізіндегі ірі контейнерлік хаб ретінде қалыптасуына септік етеді.  

– Биыл тамыз айында компания клиенттерге арнап Бірыңғай сандық терезе порталын іске қосты. Оның мақсаты – тасымал үдерісінің барлық қызметтерінде бірігетін клиенттер үшін бірыңғай кеңістік құру. Бұл портал іске қосылғанға дейін клиенттер бір тасымалдау процесі үшін сол процеске қатысты барлық қызметтерге жүгінуге мәжбүр болған, ал қазір олар соны БСТ, яғни бірыңғай сандық терезе арқылы жылдам жүзеге асырады, бұл клиенттер үшін өте тиімді қызмет болып отыр, – дейді спикер.  

Қазақстан бүгінде халықаралық логистикадағы өзінің беделін нығайту жолында батыл қадамдар жасауда. Транзиттік тасымалдың артуы, жаңа бағдарлар мен логистикалық сервистердің дамуы және халықаралық бастамаларға белсенді қолдау білдіруі елімізді Еуразиялық көлік нарығында негізгі «ойыншыға» айналдыруда. Әсіресе инфрақұрылымды дамыту мен жаңғыртуға ерекше көңіл бөлінуі Қазақстанның ағымдағы сын-қатерлерге төтеп беріп қана қоймай, тасымал көлемінің артуына дайын болуын да қамтамасыз етуде. Хабтарды дамыту және көлік дәліздерінің өткізу қабілетін кеңейту сервис сапасын арттыруға, болашақта тұрақты тасымал өсімін қамтамасыз етуге ықпал етуде.