Трансшекаралық хабтар дамиды

Өткен аптада Премьер-министр Олжас Бектеновтің төрағалығымен өткен Үкімет отырысында трансшекаралық хабтарды дамыту мәселесі қаралды. Соның ішінде бес ірі көлік-логистикалық хабты жаңғырту барысы талқыланды.  

Көлік инфрақұрылымын жаңғырту, халықаралық дәліздерді дамыту және кедендік рәсімдерді оңайлату жөніндегі шаралар туралы көлік вице-министрі Мақсат Қалиақпаров баяндады. Ол Каспий торабын дамыту аясында Ақтау және Құрық теңіз порттарын жаңғырту жұмыстары қарқынды жүріп жатқанын хабарлады. Ақтау портында контейнерлік хаб салу бойынша жобаны іске асыру басталды. Жұмыстың аяқталуы келесі жылдың соңына жоспарланған. Оны іске асыру порттың өткізу мүмкіндігін жылына 250 мың ЖФБ-ға дейін арттыруға мүмкіндік береді. Құрық портына келетін болсақ, биыл қуаты жылына 1 млн тонна болатын жаңа астық терминалы іске қосылды.  

Сауда және интеграция министрі Арман Шаққалиев Премьер-министрге Маңғыстау облысындағы Ақтау және Құрық порттарында контейнерлік хабтар мен Астана, Алматы, Шымкент және Ақтөбе қалалары әуежайларында мультимодальды әуе хабтарын құру пысықталып жатқанын айтты. Үкімет басшысы Шығыс-Батыс, Солтүстік-Оңтүстік және Транскаспий халықаралық көлік бағыты дәліздері әлеуетін тиімді пайдалану қажеттігіне тоқталды. Себебі олар Қытай, Парсы шығанағы елдері, Кавказ және Еуропа нарықтарына шығуды қамтамасыз етеді. Қазақстанда бес хабты толық іске қосу жүктерді өткізу уақытын қысқартуға, өнеркәсіп өндірісінің көлемін арттыруға және салық түсімдерін ұлғайтуға мүмкіндік береді. Сондай-ақ инвестициялар мен технологияларды тартып, маңызды жобаларды іске асыруға, жаңа тұрақты жұмыс орындарын құруға жол ашылады.

Отырыста Құрық портындағы «Саржа» көпфункционалды теңіз терминалын салу бойынша жүргізіліп жатқан жұмыстар туралы да баяндалды. Жоба Semurg Invest компаниясының жеке инвестициялары есебінен жүзеге асырылады. Сыйымдылығы жоғары астық терминалын, жалпы жүк терминалын, әмбебап терминал мен сұйық жүк терминалын іске қосу жоспарланып отыр.

– Маңғыстау облысы арқылы стратегиялық маңызы бар екі мультимодальды дәліз өтеді. Олар – Транскаспий халықаралық көлік бағыты және Солтүстік-Оңтүстік дәлізі. Көлік әлеуетін толық ашу үшін өңірдің теңіз порттарындағы инфрақұрылымдық жобаларды іске асыру бойынша нақты шаралар қабылдап, «Каспий торабының» терминал қуатын арттыру қажет. Бұл жобалар елімізге Каспий жағалауындағы серіктестерімен тиімді байланыс орнатуға мүмкіндік береді, – деді Олжас Бектенов.

Премьер-министр трансшекаралық хабтарды қалыптастыру барысында жоспарлы нәтижелерге қол жеткізу үшін барлық ресурстарды жұмылдыру қажеттігіне назар аударды. Өзбекстанмен шекарадағы «Орталық Азия» хабы жобасының өзі темір жолдың өткізу қабілетін жылына 20 млн тоннаға арттыруға мүмкіндік береді. Ақтау портында контейнерлік хаб құру жүкті ауыстырып-тиеу көлемін жылына 92 мыңнан 300 мың контейнерге дейін ұлғайтуға жағдай жасайды.  

– Жалпы, хабтар жүйесі біздің сауда серіктестерімізбен біртұтас сауда-көлік кеңістігін қалыптастыруы тиіс. Бұл – мемлекеттер арасындағы тауар айналымын айтарлықтай арттырып, көршілес елдермен стратегиялық қарым-қатынасты нығайта түседі, – деп атап өтті Премьер-министр және осыған байланысты тиісті министрліктерге бірқатар тапсырма берді.