Транзиттік әлеует айқын

Еліміздің теміржол саласы халықаралық көлік жүйесіндегі орнын нығайта отырып және транзиттік тасымал өсімін қамтамасыз ете отырып, Қазақстанның транзиттік әлеуетін дамытудағы көшбасшы рөлін бекіте түсті.  

Өткен жылы Қазақстан арқылы транзитпен 400 мың ЖФЭ контейнер тасымалданды. Қытай – Еуропа бағдары бойынша тасымал көлемі 28 есе өсті. Қытайдың Сиань қаласындағы терминал 330 контейнерлік пойыз жөнелтіп, тарихи рекорд орнатты.  

«Kazlogistics» көлікшілер одағы бас директоры Қанат Әлмағамбетовтің айтуынша, былтыр ҚР-ның 2025-2029 жылдарға арналған контейнерлік жүктерді және контейнерлік тасымалды дамыту бойынша Кешенді жоспарын әзірлеуде белсенді жұмыстар жүргізілді. Көлік және логистика саласында ІТ шешімдер іздеу жұмыстары жалғасуда.  

– 2024 жыл транзит үшін өте ерекше жыл болды. Атап айтқанда, теміржолмен тасымал көлемі 27 млн тоннадан асты, бұл Қазақстанның көлік дәлізі ретіндегі тұрақты рөлін көрсетеді. Ал 2025 жылы ведомствоаралық өзара іс-қимыл, инфрақұрылымды жаңғырту және жаңа технологияларды енгізу маңыздылығы артады, – дейді спикер.  

Ұлттық компания инновацияларды енгізе және қолданыстағы бағдарларды жетілдіре отырып көлік дәліздерін қарқынды дамытуда. Атап айтқанда ТХКБ Қазақстан экспорты мен транзиттік тасымал үшін жаңа перспективаларға жол ашты.  

Былтыр алғаш рет Баку – Сиань контейнерлік пойызы бар болғаны 12 тәулікте жеткізіліп, рекорд орнатты. Сонымен қатар алғаш рет Иран – Қазақстан – Қытай, Қытай – Қазақстан – Өзбекстан бағыттары бойынша пилотты жобалар жүзеге асырылды. «Khorgos Gateway» құрғақ портының терминалында автокөліктерді контейнерлеу қызметі енгізілді. Әрбір жаңа жоба Қазақстанның Еуразияның жетекші транзиттік хаб ретіндегі орнын айқындай түсті.  

Қазақстан халықаралық серіктестерімен де байланысын белсенді нығайтып келеді. Мысалы, 2024 жылы Қытай мен Еуропаның жетекші көлік-логистикалық компанияларымен 20-дан астам келісімге қол қойылған.