Қазақстан мен Қытай арасындағы тасымал көлемі 32 млн тоннаға жетті

Қазақстан мен Қытай арасындағы тасымал көлемі жылдан жылға өсіп келеді. ҚТЖ жедел штабының өкілі Мұнар Айтжановтың мәлімдеуінше өткен жылы ол 32 млн тоннаны құрап, 2023 жылдан 13 пайызға артқан. Аталған жылы Қытайға 20 млн тонна жүк жөнелтіліп, 12 млн тоннасы қабылданған еді. Былтыр контейнерлік тасымал көлемі 1,7 млн ЖФЭ болып, 16 пайызға артты.

Соңғы 5 жылда ҚТЖ-да жүк көлемі 1,5 есе немесе 10,5 млн тоннаға өскен. Соның ішінде Қытайға бағытталған жүк тасымалы 6 млн тоннаға немесе 43 пайызға, ал ол елден келген жүк 4,5 млн тонна немесе 58 пайызға көбейді. 2020 жылдан бері контейнерлік тасымал көлемі 70 пайыз артып, 718 мың ЖФЭ құраған. Сол сияқты ҚХР-дан келетін контейнерлік жүк те 54 пайызға артып, 378 мың ЖФЭ құрағаны белгілі.  

– Біздің елдеріміз арасындағы жүк айналымының өсуі Қазақстан мен Қытай Халық Республикасы арасындағы екіжақты ынтымақтастықтың нығаюымен тікелей байланысты, бұл бірінші кезекте өзара сауданы дамыту үшін экономикалық ынтымақтастықты тереңдету есебінен және соның нәтижесінде тауар алмасу өскенін білдіреді. Қазақстан темір жолы «Бір жол, бір белдеу» жобасын іске асыруға белсенді қатысады. Өткен жылы Каспий теңізі арқылы Еуропа мен Таяу Шығысты байланыстыратын Транскаспий халықаралық көлік бағдары бойынша тасымалдың өсуі байқалды. Осылайша, 2024 жылдың қорытындысы бойынша 20 есе өсім тіркелді. Жүк тасымалдау саласында темір жол және терминалдық инфрақұрылымды қатарынан дамыту маңызды рөл атқарады, бұл жыл сайын тасымалдау көлемін сенімді түрде арттыруға мүмкіндік береді. Қазақстан, Қытай, сондай-ақ Ресей мен Еуропа аумақтарында көліктік логистикалық кешендерді дамыту жөніндегі бірлескен инвестициялық жобалар жүк айналымын ұлғайтуда, сондай-ақ жүктерді жеткізу сапасы мен жылдамдығын арттыруда маңызды рөл атқарады, – дейді М. Айтжанов.

ҚХР-ға берілетін жүктердің негізгі үлесін 7,7 млн тонна металл кендері құрайды, одан кейін 6,2 млн тонна контейнерлердегі жүктер, бұдан әрі жоғары өңдеу дәрежесі бар өнімдер – 1,8 млн тонна түсті және қара металдар, 300 мың тонна мұнай өңдеу өнімдері (кокс), 100 мың тонна химиялық жүктер құрайды. 2024 жылы 3,3 млн тоннадан астам астық жүктері экспортталды – бұл 1,8 млн тонна астық және 1,5 млн тонна астықты қайта өңдеу өнімдері.  

Қытайдан контейнерлермен жөнелтілетін 10,5 млн тонна жүктің құрамында халық тұтынатын тауарлар, электроника, тұрмыстық техника бар. Сонымен қатар аспанасты елінен 500 мың тонна қара металл, 400 мың тонна химиялық жүктер, 150 мың тонна азық-түлік, 170 мың тонна құрылыс заттары жеткізілген. Жыл сайын автомобиль мен оларға қосалқы бөлшек дөңгелектер жеткізу көлемі де артуда.  

– Өткен аптада ҚТЖ мен Үрімші темір жолы арасында екіжақты кездесу өтіп, онда былтырғы жұмыс- тар қорытындыланып, биылғы жоспар сөз болды. Осы жылы жүк тасымалын 1 млн тоннаға, яғни 3 пайызға өсіру межеленіп отыр. Биыл Достық – Мойынты телімінде екінші жолдар құрылысын аяқтау жоспарлануда. Бұл Достық – Алашаңқай шекара өткелі бойынша пойыздар алмасуын екі есе арттыруға мүмкіндік береді. Достық станциясын жаңғырту, кең шанақты 5 жолдан тұратын қосымша парк салу, жүк қабылдап-жөнелтетін паркте кең және тар шанақты қосымша 2 жол төсеу көзделуде, – деп мәлімдеді М.Айтжанов.  

Айтуынша, мұның бәрі – Қазақстан мен Қытай темір жолдарының үйлесімді жұмысының нәтижесі. Шекара маңы станцияларының дамуымен бірге сенім мен өзара түсіністікке негізделген көп жылдық ынтымақтастық алға қойылған барлық мақсаттарға қол жеткізіп, белгіленген жоспарды жүзеге асыруға септік етеді.