Кәсіптік білім – табысты болашақтың кілті
«Қазақстан теміржолшысы» газетінің тілшісі
«Жұмысшы мамандықтары жылы» аясында ҚТЖ компаниясында теміржол көлігі мамандығын дәріптеу, беделін арттыру бағытында белсенді жұмыстар жүргізілуде.
Өткен аптада «ҚТЖ» ҰК» АҚ «Теміржол көлігіндегі персоналды бағалау және дамыту орталығы» филиалы базасында «KAZLOGISTICS» көлікшілер одағы және «Атамекен» кәсіпкерлер палатасы өкілдерінің қатысуымен «Кәсіптік білім – табысты болашақтың кілті» атты дөңгелек үстел өтті.
«KAZLOGISTICS» көлікшілер одағы Қазақстан экономикасында негізгі рөл атқаратын 550 көлік және логистикалық компанияны біріктіреді. Бұл компанияларда білікті мамандар жетіспеушілігі және кадр дайындау жүйесін жаңғырту қажеттілігі жоқ емес. Аталған дөңгелек үстелге қатысушылар осы мәселелерді шешу үшін бірлескен жұмыстар жүргізіп, кәсіби білім беру жолдарын қайта қарастыру, бизнес пен оқу орындары арасындағы ынтымақтастықты арттыру қажеттігін көтерді. Жиынға қатысушылар бизнес, білім беру ұйымдары және мемлекеттік құрылымның бірлесе күш жұмсауы білікті техникалық кадрлар дайындауда сапалы жүйені құруға септік етеріне сенім білдірді.
Жиын барысында Теміржол көлігіндегі персоналды бағалау және дамыту орталығының еліміз бойынша мыңдаған теміржолшы мамандардың біліктілігін арттырып, салаға сапалы кадрлар дайындаудағы рөлі сөз болды.
– Негізгі бағытымыз – барлық теміржол мамандықтары бойынша кәсіби дайындау және қайта дайындау. Цифрлық технологияларды қолдана отырып күндізгі және қашықтан оқыту курстары біздің жүйемізді теміржолшылар үшін ыңғайлы, икемді ете түседі. Мұнда үздік оқытушылар, өндірістік оқыту бойынша тәжірибелі шеберлер, сала сарапшылары дәріс оқиды. Жыл сайын 23 мыңнан астам мамандарды оқытамыз.
Орталық 16 оқу сыныбынан, 11 заманауи зертханадан, 1 оқу полигонынан, 1 жатақханадан тұрады. Ақтөбе, Қарағанды, Павлодар және Тараз қалаларында филиалдарымыз бар. Оларда 87 оқу сыныптары, 10 зертхана, 4 оқу полигоны және 4 жатақхана жұмыс істейді. Барлығы 120 түрлі мамандық, 231 оқу бағдарламасы бойынша білім береміз. Теміржол көлігі мамандарын осы бағытта оқытып келе жатқанымызға 20 жылдан асты. Нарық талабына сай оқу әдістемесін үнемі жаңартып отырамыз, – деді аталған орталық директоры Оқас Сапаров. Іс-шараға орталық директорының орынбасары Ирина Капанова модераторлық етті.
«KAZLOGISTICS» көлікшілер одағының бас директоры Қанат Әлмағамбетов тасымал сенімділігі мен көлемін арттыру, қауіпсіздікті нығайту үшін кадр сапасын үнемі жақсартып отыруда мұндай іс-шаралардың маңыздылығын атап өтіп, кезінде аталған орталықтың теміржолшылардың кәсіби біліктілігін арттыру үшін құрылғанын еске алды. Ал «ҚТЖ» ҰК» АҚ HR директоры Әлихан Қыраубаев еңбек өнімділігі қызметкерлердің қаншалықты білімді және жұмысқа ынталы екендігіне байланысты болатынын тілге тиек ете келе, тәжірибе көрсеткендей, білікті кадрлар тек күнделікті жұмыстағы талаптарды, ережелерді, нұсқаулықтарды мүлтіксіз орындап қана қоймай, төтенше жағдайлар кезінде шұғыл және дұрыс шешім қабылдай алатынын алға тартты. Қозғалыс қауіпсіздігі департаментінің бас менеджері Мұрат Мусин аталған орталықтың қозғалыс қауіпсіздігін қамтамасыз ету мәдениетін қалыптастыруда негізгі рөл атқаратынын атап өтті. Мұнда тек теміржолшылар ғана емес, Көліктегі полиция қызметкерлері де оқып, біліктілігін арттыруы орталықта білім беру сапасының жоғары екенін айғақтайды.
Жиын соңында «ҚТЖ» ҰК» АҚ мен «KAZLOGISTICS» КО арасында кәсіби білім беру саласындағы ынтымақтастықты арттыру туралы Меморандумға қол қойылды.
