Көмір тасымалы жалғасуда

Семей ЖТ бөлішесі бойынша жүк айналымының басым бөлігін көмір тасымалы құрайды. Жыл бойы жүргізілген тиеу-түсіру жұмыстары соңғы кезеңдері нәтижелі жүргізілді деуге негіз бар.

Бөлімшенің логистика және жүк тасымалын ұйымдастыру бөлімі мамандарының есебінше, ағымдағы жылыту маусымы бойынша бір ғана Абай облысының көмірге деген жалпы қажеттілігі 1 млн 247 мың тоннаны құрапты. Оның ішінде жеке сектордағы тұрғындар үшін жергілікті теміржолшылар бүгінгі күнге дейін 567 мың тонна қатты отын жеткізген. Ал жылу орталықтары мен қазандықтары үшін 595 мың тоннадан асатын көмір тасымалданыпты. Бұл шаралар қазіргі күні сұраныс төмендегенімен әлі де жалғасатын болады. Жалпы жылдық жоспардың орындалу барысы жүз пайызға таяу.  

Облыстың коммуналдық-тұрмыстық секторына және жылу көздеріне көмірді уақытылы жеткізу үшін «Қаражыра» АҚ және Абай облыстық әкімдігімен бірлесіп Қаражыра көмір кенішінен көмір жеткізудің арнайы кестесі бекітілген болатын. Жыл бойына кестеден ауытқу болған жоқ. Сәйкесінше, теміржолшылар қауымының жұмысына сын да айтылмады. Жалпы, соңына таяп қалған биылғы жылғы жылыту маусымының өту барысы тұрақты бақылауда.  

Жалпы, былтырғы қыс мезгілінде аймақ көлемінде тұрғындар мен коммуналдық-тұрмыстық сектор үшін көмір босатылатын 12 пункт болған болса, осы жылыту маусымында көмір сататын пункттердің саны 16-ға жетті. Барлық нысандарға күніне ең кемі 9 вагон көмір тұрақты түрде жеткізіліп тұрды. Дегелең станциясындағы өндіріс барысы жыл бойына штаттық режимде жүргізілді.  

Бұл орайда желі бойындағы барлық станциялардағы көмір тұйықтарына көмірдің қажеттілігі мен жеткізілуіне күнделікті түрде мониторинг жүргізіледі. Теміржолшылар қауымы тасымал барысында кідіріс тумауы үшін көмірге деген қажеттілікті толық есептеп, жоспармен жұмыс жүргізуде.  

Мәселен, 2025 жылғы 27 наурыздағы жағдай бойынша облыстағы теміржол тұйықтарында 9 мың 500 тоннадан асатын көмір қоры бар екен.  

Айта кетер тағы бір жайт, биылғы жылы теміржол тұйықтарындағы бағалар көмір разрезіне дейінгі қашықтыққа байланысты 14,2 мыңнан 19,5 мыңға дейін өзгеріп отырды. Бұл – республикадағы ең төменгі баға. Яғни теміржол тұйықтары бар Семей, Шар, Жаңғызтөбе, Аягөз станциялары бойынша көмірге деген сұраныс жылда жоғары болады. Сәйкесінше жұмыс та қауырт.  

Биылғы жоспарлы жұмыстар келергі мамыр айы аяқталғанға дейін жүргізіледі. Ал маусым айынан бастап алдағы жылыту маусымына қатысты іс-шаралар бастау алмақ. Осы ретте теміржолшылар ұстанымы бойынша аймақтағы барлық теміржол тұйықтарында ең кемі 5 мың тоннадан асатын көмір қоры болуы тиіс. Желі бойындағы көмір тұйықтарының тәулігіне 17-19 тонна көмір түсіруге мүмкіндігі бар. Яғни қатты отын тасымалы жазғы мезгілде де кедергісіз әрі кең көлемде жүргізіле береді деуге толық негіз бар. Қысқасы, көмір тасымалы тоқтаған жоқ.