Қазақстан баламалы маршруттарды белсенді дамытуда

Стамбул қаласында «Тұрақты жаһандық құн тізбегіндегі байланысты қалай тиімді етуге болады?» тақырыбында Экономикалық ынтымақтастық және даму ұйымының дамушы нарықтар жөніндегі форумы өтті.

Іс-шараға G20 елдерінің және басқа да дамушы елдердің экономика министрлері мен орынбасарлары, халықаралық ұйымдар өкілдері, дипломаттар, сарапшылар, сондай-ақ жеке сектор өкілдері қатысты. Қазақстандық делегация құрамында форумға ҚР Сауда және интеграция вице-министрі Жанель Кушукова бастаған мүдделі тарап өкілдері қатысты.  

Іс-шара аясында сауда-көлік байланысының тұрақтылығы мен ауқымдылығына, мультимодальды дәліздерді дамытуға, сондай-ақ жаһандық қосылған құн тізбегін интеграциялауға қатысты негізгі мәселелер талқыланды. Цифрландыруға, инфрақұрылымды тұрақты қаржыландыруға, өңірлік ынтымақтастыққа және жаһандық сын-қатерлер жағдайында бизнесті қолдауға ерекше назар аударылды.  

Форум барысында ҚР Сауда және интеграция вице-министрі жаһандық геоэкономикалық өзгерістер жағдайында сауда-көлік байланысын нығайтудың маңыздылығын атап өтіп, елдің негізгі басымдықтарына тоқталды. Қазақстан теңізге шыға алмайтын мемлекет ретінде Транскаспий халықаралық көлік бағдарын, «Солтүстік-Оңтүстік» және Трансауған дәлізін қоса алғанда, баламалы маршруттарды белсенді дамытуда. Осылайша, ТХКБ бойынша тасымалдау көлемі 2024 жылы 63% өсіп, 4,1 млн тоннаны құрады. Контейнерлік тасымалдар 2,6 есе өсті, бұл осы маршрутқа деген жоғары қызығушылықтың дәлелі.  

Сонымен қатар баяндамашы сауда байланысы контексінде «жұмсақ инфрақұрылымға» ерекше назар аудару керектігін атап өтті. Мәселен, 2024 жылы Қазақстан сыртқы экономикалық қызмет саласындағы бизнес пен мемлекеттің өзара іс-қимылының бірыңғай экожүйесі болып табылатын KEDEN кедендік ресімдеудің бірыңғай жүйесін енгізді.  

Ол Қазақстан ЕО Global Gateway және қытайлық «Белдеу және жол» бастамалары аясында белсенді ынтымақтасатынын атап өтті. Биыл Қазақстан «Қытай-Орталық Азия» екінші саммитін қабылдайды. Бұл ретте біздің еліміз Қазақстан аумағы арқылы өтетін сауда-көлік бағыттары Халықаралық әріптестер үшін барынша тиімді және ыңғайлы болатын жағдайлар жасауға ұмтылады.  

Соңында Қазақстан өкілдері инфрақұрылымға инвестициялардан бастап – цифрлық интеграция мен саясатты келісуге дейінгі бірлескен күш-жігердің қажеттілігін атап өтті. Қазақстан әріптестікке ашық және орнықты даму жолында өңірлік және жаһандық байланысты нығайтуды жалғастыруға дайын.