Транскаспий бағытының дамуы контейнерлік тасымалдың күрт өсуіне әкелді

Транскаспий көлік дәлізінің дамуы Қазақстанның контейнерлік тасымал көлемінің бірнеше есеге артуына ықпал ететін негізгі факторға айналды. Бұл туралы «KTZ Express» АҚ бас директорының орынбасары Айбек Қапар ESE ASIA-2025 II Халықаралық көлік форумы барысында мәлімдеді, деп хабарлайды Rail-news.kz.

Оның айтуынша, 2024 жылы осы бағытпен жүретін контейнерлік пойыздар саны алдыңғы жылмен салыстырғанда рекордтық өсім көрсетті: 2023 жылы 11 пойыз болса, 2024 жылы олардың саны 358-ге жеткен. Бұл көрсеткіш 303 есе артқанын білдіреді.

«Бұл — біз теңіз бөлігінен өзімізге тартып алып, шоғырландырған көлемдер. Негізінен импорттар (Әзірбайжан, Грузия, Түркия). Нақтырақ айтсақ, бұл көлемнің шамамен 60%-ы – Әзірбайжан импорты. Бұрын бұл тасымалдар теңіз арқылы жүзеге асырылатын», – деп атап өтті А. Қапар.

Сондай-ақ ол қазіргі кезде, әсіресе Қытай бағытында тасымал көлемінің жеткіліксіздігі сезілетінін айтты. Бастапқыда наурыз – сәуір айларында өсім болады деп күтілгенімен, әзірге бұл болжам орындалмаған.

«Қазіргі таңда көлемдер толық қалпына келмеді. 2024 жылы барлық транзиттік бағыттар бойынша өсім болды – 1 млн 395 мың ЖФЭ (жиырма футтық эквивалент), бұл 2023 жылмен салыстырғанда 9%-ға көп. Биыл бұл көрсеткіш төмендеп келеді, дегенмен біз көлемнің артуын күтіп отырмыз. Бастапқыда өсімді наурыз – сәуір айларында күткен едік, алайда қазіргі күні ол қалпына келген жоқ. Сондықтан енді мамыр айында артады деп үміттенеміз. Біз көлемнің төмендеуін Транскаспий бағыты бойынша да байқап отырмыз. Қаңтарда жақсы көрсеткіш болды – 56 пойыз, наурызда – 16, ал сәуірде – 10», – деп толықтырды А. Қапар.