Орта дәліз: Қытай, Қазақстан және Әзербайжан ынтымақтастығы күшейе түсті
2025 жылдың шілде айының басында Бейжің қаласында Қытай (CR) мен Әзербайжан (ADY) темір жолдары халықаралық жүк тасымалын дамытуға бағытталған өзара түсіністік туралы меморандумға қол қойды. Құжатта Орта дәліздің негізгі бөлігі саналатын Баку — Тбилиси — Карс (БТК) темір жол желісіне ерекше назар аударылып, ол арқылы транзиттік пойыздар санын тәулігіне 10-ға дейін жеткізу көзделген, деп хабарлайды Rail-news.kz.
Осы мақсатта тараптар темір жол және порт инфрақұрылымын жетілдіру, Каспий теңізі арқылы контейнерлік тасымалдарды жандандыру бағытындағы ынтымақтастықты тереңдетуге келісті. Тасымал үдерістерін оңтайландыру, тиімділік пен сапаны арттыру үшін кең көлемде цифрлық технологияларды енгізуге басымдық берілмек.
Орта дәліздің бір бөлігі саналатын Транскаспий халықаралық көлік маршрутын (ТХКМ) дамытуға қатысу үшін Қытайдың ірі контейнерлік операторларының бірі — China Railway Container Transport (CRCT) 2023 жылдың ортасында Қазақстан (ҚТЖ), Грузия (GR) және Әзербайжан (ADY) темір жолдары құрған Middle Corridor Multimodal бірлескен кәсіпорнына қосылуды жоспарлап отыр.
Сондай-ақ Қытай темір жолдары (CR) мен Қазақстан темір жолдары (ҚТЖ) 2014 жылы жасалған келісімді жаңартып, кешенді стратегиялық әріптестік туралы жаңа келісімге қол қойды. Бұл құжат көлік дәліздерін дамытуға бағытталған бірлескен жобаларды — жаңа темір жол желілерін салу, қолданыстағыларын жаңғырту, логистикалық базалар мен мультимодальды терминалдар құру, трансшекаралық операцияларды оңтайландыру үшін цифрлық технологияларды енгізуді көздейді.