Орта дәліз: Чэнду қаласынан шыққан контейнерлер 15 күнде Карсқа жетті
Қытай темір жолдарының еншілес кәсіпорны — China Railway Express (CRE) операторы жіберген контейнерлер Қытайдың оңтүстік-батысындағы Чэнду қаласынан Орта дәліз бағытымен шығып, 15 күнде Түркияның Карс қаласына жетті, деп хабарлайды Rail-news.kz.
Контейнерлер теміржолмен Алашанькоу – Достық шекара өткелі арқылы Қазақстан аумағынан өтіп, кейін Каспий теңізін пароммен кесіп өткен. Одан әрі жүк пойызы Баку – Тбилиси – Карс бағытымен жүріп отырды. Алдағы кезеңде бұл контейнерлер Ыстамбұл арқылы Еуропадағы жүк алушыларға жеткізіледі.
Сарапшылардың айтуынша, жүк тасымалы ағынының артуы және Карсты Әзербайжанның Нахчыван автономиялық республикасымен, сондай-ақ Арменияның Гюмри қаласымен теміржол арқылы байланыстыру перспективалары аясында Карсты ірі өңірлік логистикалық және транзиттік хабқа айналдыру жоспарланып отыр. Шетелдік капитал тарту мақсатында инвестициялық рәсімдерді жеңілдетіп, қолайлы іскерлік ахуал қалыптастыру көзделуде.