Меже – транзиттік хабқа айналу
«Қазақстан теміржолшысы» газетінің тілшісі
Қазақстан Еуразияның жетекші транзиттік хабына айналуға ұмтылуда. Бұл бағытта Мемлекет басшысы халыққа жолдауында жаңа көлік дәліздерін салу, логистикалық орталықтарды жақсартуға қатысты негізгі тапсырмалар берген болатын.
Транскаспий бағыты Еуразиялық логистиканың негізгі буынына айналуда: соңғы бес жылда жүк тасымалы 6 есеге артты. Мемлекет басшысының Жолдауында серіктес елдер – Қытай, Әзербайжан, Грузия және Түркиямен Транскаспий халықаралық көлік бағытын дамыту үшін күш-жігер бірлестіру міндеті қойылды. Бүгінде осы бағыттағы жұмыс айтарлықтай нәтиже беруде.
Серіктестермен бірлесе отырып 2027 жылға дейін «тұйық» жерлерді синхронды жою бойынша жол картасы әзірленді. Оның аясында «Достық-Мойынты» теміржол желісі пайдалануға берілді, Алматы станциясының айналма жолы салынуда, порт инфрақұрылымы жаңғыртылуда: Құрық портының акватория түбі тереңдетілді, қуаттылығы 1 млн тонна астық терминалы және Ақтау портында контейнерлік хаб іске қосылды.
Қазақстаннан тыс жерде порт инфрақұрылымы белсенді дамып жатыр. Атап айтқанда 2025 жылдың маусымында Грузияның Поти портында аумағы 8,9 гектар жылына 120 мың контейнер өңдеуге қауқарлы қазақстандық мультимодальды терминал іске қосылды. Соңғы бес жылда бұл бағыт бойынша жүк тасымалының көлемі алты есеге ұлғайды, 2020 жылғы 0,8 млн тоннадан 2024 жылы 4,5 млн тоннаға жетті. Тек былтырдың өзінде тасымал көлемі 62%-ға артып, контейнерлік тасымал 2,7 есеге көбейді. Биылғы жылдың алғашқы жартысында тасымал көлемі 2,3 млн тоннаға жетіп, бұл өткен жылдың сәйкес кезеңімен салыстырғанда 7%-ға артық болды. Сонымен қатар контейнерлік тасымалдың айтарлықтай артуына кедендік рәсімдерді автоматтандыру да ықпал етті: енді бір контейнерлік пойызды рәсімдеуге небәрі 30 минут кетеді, бұрын бұл процесс үш сағатқа дейін созылатын еді.
«Жуырда Қытай тарапымен бірлесіп Ақтау портында контейнерлік терминал іске қосылды. Сиань қаласында біздің құрғақ порт табысты жұмыс істеп тұр. Селятино, Свислочь және Будапешт маңында жаңа терминалдар салынуда», – дейді ҚР Көлік вице-министрі Мақсат Қалиақпаров.