Орта дәліздің келешегі талқыланды
«Қазақстан теміржолшысы» газетінің тілшісі
Транскаспий халықаралық көлік бағдарының тартымдылығы Қазақстан темір жолының мүмкіндігін жаңа деңгейге көтеріп отыр. 2025 жылдың өткен 10 айында ТХКБ бойынша теміржол көлігімен тасымал көлемі 2,6 млн тоннаны құрап, ондағы қазақстандық жүктердің экспорттық үлесі 74 пайызға жеткен.
Бұл аталған бағдарға халықаралық деңгейде қызығушылықты арттыра түскен. Жуырда ҚТЖ-да өткен Эстония делегациясымен кездесуде екі ел арасындағы теміржол тасымалының қазіргі жай-күйі, өзара іс-қимыл және Транскаспий халықаралық көлік бағдарын дамыту мәселелері талқыланды.
Осы жылдың 10 айында Қазақстан мен Эстония арасындағы теміржол көлігімен жүк тасымалдау көлемі 264,1 мың тоннаны құрады, бұл 2024 жылдың сәйкес кезеңімен салыстырғанда 61,4%-ға жоғары. Кездесуде тараптар Орта дәліз Қазақстан арқылы транзиттің стратегиялық маңызды бағытына айналатынын атап өтті. Қытайдан Еуропаға жүктерді жеткізу уақыты 15-18 күнді құрайды, бұл теңіз жолынан екі есе жылдам.
ҚТЖ сервисінің сапасын арттыру үшін PSA International компаниясымен бірлесіп транзиттік декларациялаудың ашықтығын, Қазақстанның бүкіл аумағы бойынша жүктерді қадағалауды және бірыңғай цифрлық құжат айналымын қамтамасыз ететін мультимодальды тасымалдардың цифрлық дәлізі енгізілді. Қазақстан аумағында теміржол операторы, экспедитор және кеден органдары арасындағы цифрлық процестердің интеграциясы аяқталды, бұл жүктердің өтуін жеделдетуге мүмкіндік береді.
ҚТЖ тұрақты тарифтерді, жеткізудің оңтайландырылған мерзімдерін және клиентке бағдарланған сервисті ұсына отырып, клиенттер үшін маршруттың тартымдылығын арттыру бойынша жұмысты жалғастыруда. Орта мерзімді перспективада компания орта дәліз бойынша жүк ағынын 10 млн тоннаға дейін арттыруды жоспарлап отыр.