«Бір белдеу, бір жол»: Жаңа сауда дәліздері қалай дамиды?

Гонконгте өткен «Бір белдеу, бір жол» он бірінші саммитінде сауда, инвестиция және көлік байланысын дамыту мәселелері талқыланды. 2013 жылы Астана қаласында Қытай Халық Республикасының Төрағасы алғаш рет Жібек жолының экономикалық белдеуін құру идеясын ұсынған болатын.

Бүгінде бұл бастама дамудың жаңа кезеңіне өтіп жатыр. Енді физикалық инфрақұрылыммен қатар цифрлық байланыс, трансшекаралық деректер алмасу және өзара үйлесімді цифрлық платформалардың маңызы артып келеді. Сауда және интеграция министрлігінің хабарлауынша, жиынға қатысқан аталған ведомство басшысы Арман Шаккалиев бұл бастаманың Қазақстан үшін тарихи маңызына ерекше тоқталған.  

Саммитте Қазақстанның көлік-транзиттік әлеуетіне де жіті назар аударылды. Ел теміржол және автомобиль инфрақұрылымын, шекаралық өткізу бекеттерін, логистикалық орталықтарды және Транскаспий халықаралық көлік бағдарын – Орта дәлізді жүйелі түрде дамытып келеді. Қазір Қытай мен Еуропа арасындағы құрлық арқылы өтетін теміржол жүк тасымалының шамамен 85%-ы Қазақстан аумағы арқылы өтеді.  

Қазақстанның мақсаты – транзит көлемін арттырумен ғана шектелмей, жаңа өндірістер мен инвестицияларға, сондай-ақ өңірлік жеткізу тізбектерін қалыптастыруға мүмкіндік беретін толыққанды экономикалық дәліз құру. Қазақстан Азия мен Еуропаны байланыстыратын маңызды көлік-логистикалық буын ретіндегі орнын нығайтып келеді. Ал Гонконг қаржы, инвестиция, басқару және кәсіби сараптама салаларындағы мүмкіндіктерімен ерекшеленеді. Сауда және интеграция министрі жиында Қазақстандағы көлік-логистикалық инфрақұрылымды дамыту бойынша атқарылып жатқан ауқымды жұмыстар туралы баяндап, жаңа бағыттарды қалыптастыру тек транзит көлемін арттырумен шектелмеуі керектігін атап өтті. Оның айтуынша, бұл үдеріс өнеркәсіптік кооперацияны дамытумен қатар жүруі тиіс.  

Кездесуде «Қазақстан және Орталық Азия – Қытайдың құрлықтық бөлігі – Гонконг» форматындағы өзіндік үшжақты ынтымақтастықты дамыту ұсынылды. «Қазақстан серіктестікке ашық және бірлескен іс-қимылға дайын. Біздің міндетіміз – Еуразиядағы көлік байланысының артып келе жатқан мүмкіндіктерін жаңа өндірістерге, инвестицияларға және тұрақты сауда байланыстарына айналдыру», – деді министр.