Еуропа мен Орта Азия елдерінің Қазақстан арқылы жүк алмасуына эстониялықтар мүдделі
«Қазақстан теміржолшысы» газетінің тілшісі
«ҚТЖ» ҰК» АҚ еншілес ұйымы – «KTZ Express» АҚ Бас директоры Нұрлан Игембаев Эстония темір жолдарының басқарма төрағасы – бас директоры Кайдо Зиммерман бастаған делегациямен келіссөз жүргізді. Нұрлан Игембаев Эстония мен Қазақстан темір жолдарының арасында ынтымақтастықты дамыту үшін әлеует бар екенін атап өтті. Оның айтуынша, Қазақстан аумағы арқылы Эстонияға Өзбекстаннан мұнай өнімдері, ЕО және АҚШ елдерінен Орталық Азия елдеріне машиналар мен жабдықтар жеткізіледі. Өз кезегінде Эстония делегациясы Қазақстанды перспективалы серіктес ретінде көретіндерін айтты. Кездесу барысында биылғы жылдың бірінші жартыжылдығында Қазақстанның магистральдық желісі бойынша транзиттік жүк тасымалдау жоспары 5%-ға асыра орындалып, 10,3 млн тоннаны құрағаны атап өтілді. Контейнерлік тасымалдар 44%-ға ұлғайып және жиырма футтық баламада 532 мың контейнерге жеткен. Бұл арада, 58% құрайтын негізгі өсім Қытай-Еуропа бағытындағы контейнерлік тасымалдарға тиесілі болып отыр. Ресейден Қытайға және кері қарай тасымалдау айтарлықтай (69%-ға) өскен. Орталық Азия бағдарларында да, мәселен, Қытайдан 31%-ға, Қиыр Шығыс порттарынан 3%-ға, сондай-ақ Қытай, Қазақстан, Каспий теңізі акваториясы, Әзербайжан, Грузия арқылы және одан әрі Түркия мен Еуропа елдеріне өтетін ТХКБ (Транскаспий халықаралық көлік бағдары) бойынша 2,3 есе өсімнің бар екені байқалып отыр.