Рейстік модельдің тың тәсілі

Жаңалықтар

03.02.2017, 10:32

Оқуға 2 мин

Шартараптан ағылған жылжымалы құрамдар тоғысатын, шығыстағы ең ірі тораптық әрі түйіспелі Семей станциясы жылды жаңашыл шаралармен бастады. Ол – рейстік модельдің «берік тармақ» түрі. Өткен жылдың соңғы тоқсанында нормативтік-техникалық құжаттамалар қайта реттеліп, өндіріс барысына тың талаптар енгізілген болатын. Осы өзгерістер нәтижесінде семейлік теміржолшылардың күнделікті қызмет барысында да елеулі жаңашылдықтар орын алуда. Семей станциясы бүгінде «үш топтық тәсіл» бойынша жұмыс жасауға көшкен. Яғни, келген пойыздардың өңделетін уақыты азайтылды. Мәселен, транзиттік пойыздар уақыты 10 минутқа үнемделсе, ал станцияның өз басындағы, яғни, жергілікті жылжымалы құрамдарды жасақтау 50 минутқа дейін азайтылды. Қозғалысшылар тілімен айтқанда станция бойынша рейстік модельдің «берік тармақ» түрі қалыптасуда. Бұған қоса, жүк пойыздары да бекітілген кесте бойынша, уақытқа сай қатынауға көшкен. Мұның барлығы қозғалыс барысын жоспарлауға, жұмысты жүйелеуге мүмкіндік туғызады екен. Әсіресе, толаскез өткізу мен пойыздарды сұрыптауда мол тиімділік береді. Сондай-ақ, жылжымалы құрамдар жол айрықтарында бірін-бірі тосып, көп бөгеліп қалмайды. Жүкті сақтау қауіпсіздігі бойынша да берері мол. Қазіргі күні шамалы қиындықтар болғанымен станция қызметкерлері аталмыш тәсіл бойынша жұмыс жасауға төселіп қалыпты. –Бүгінгі уақытта станция бойынша вагон тапшылығы айқын сезілуде. Бұл жүк тиеу мәселесінде айтарлықтай нұқсан келтіреді. Алайда, бұл тек бізге ғана емес, күллі ұлттық компанияға тән жайт. Сол себепті де, вагон айналымын жылдамдатудың маңыздылығы күн талабынан түспей тұрған жайт. Өндіріс мәселесінде аталмыш тақырып біздің станциямыз бойынша да бірінші кезекте қозғалады, – дейді Семей станциясының бастығы Ғабит Есқожанов. Жалпы, бүгінгі таңда байтақ республикамыз бойынша орта есеппен алғанда 7 мыңдай вагон қажет көрінеді. Жаһандық дағдарыс салдарынан сауығып келе жатқан ел экономикасы үшін бұл маңызды мәселе саналады. Осы орайда аталмыш станция бойынша вагон айналымын жылдамдату бағытында қолға алынған шаралар көп. Межелі жоспарлар да жетерлік. Мәселен, вагондарды қос тараптан, анығырақ айтсақ, уақыт ұттырмау үшін алды-артынан тіркей беру ісі қарастырылуда. Бұл тың әдіс вагондарды қабылдау мен жинауда мол тиімділік береді екен. Қазіргі күні станция бойынша ең төменгі көрсеткіштің өзі 104 пайызға жеткен. Өткен жылдың үлесінде ақаулықтарға жол берілген жоқ. Өндірістегі жетістіктердің бұлайша еселенуіне жаңа техникалық үдерістерге көшу мүмкіндік беріпті. Оған сәйкесінше, жұмыс барысына қойылатын қызметтік талап пен қажеттіліктер саны да артқан. Атап айтсақ, станция басында қосымша жолдар салып, тұйық желілерді ұзарту қажеттілігі туындауда.

Рейстік модельдің тың тәсілі

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл